പാരീസ്: പാർലമെന്റിൽ വോട്ടെടുപ്പില്ലാതെ പെന്ഷന് സമ്പ്രദായം പരിഷ്കരിക്കാൻ ഫ്രഞ്ച് സർക്കാർ തീരുമാനിച്ചതിന് പിന്നാലെ പാരീസിൽ വൻ പ്രതിഷേധം. പ്ലേസ് ഡി ലാ കോൺകോർഡിൽ ആയിരക്കണക്കിനു പ്രതിഷേധക്കാർ പോലീസുമായി ഏറ്റുമുട്ടി. ഇതോടെ പ്രതിഷേധക്കാരെ പിരിച്ചുവിടാൻ പോലീസ് കണ്ണീർവാതകം പ്രയോഗിച്ചു.
പ്രധാനമന്ത്രി എലിസബത്ത് ബോൺ ഭരണഘടനയുടെ ആർട്ടിക്കിൾ 49:3 പ്രകാരം സഭയിൽ വോട്ടെടുപ്പ് ഒഴിവാക്കാൻ സർക്കാരിനെ അനുവദിക്കുകയായിരുന്നു. വിവാദ ബില്ലിൽ എംപിമാർ വോട്ട് ചെയ്യുന്നതിന് മിനിറ്റുകൾക്ക് മുമ്പായിരുന്നു തീരുമാനം. ബില്ലിൽ ഭൂരിപക്ഷം ലഭിക്കുമെന്ന ഉറപ്പ് ഇല്ലാതിരിക്കെയാണ് വോട്ടെടുപ്പ് ഒഴിവാക്കിയത്.
വോട്ടെടുപ്പ് ഒഴിവാക്കിയതിന് പിന്നാലെ പ്രതിപക്ഷ നേതാക്കൾ സഭയിൽ പ്രതിഷേധമുയർത്തി. പ്രസിഡന്റ് ഇമ്മാനുവൽ മാക്രോണിന്റെ സർക്കാരിനെതിരെ അവിശ്വാസ പ്രമേയം കൊണ്ടുവരണമെന്ന് തീവ്ര വലതുപക്ഷ പ്രതിപക്ഷ നേതാവ് മറൈൻ ലെ പെൻ നിർദേശിച്ചു.
വോട്ടെടുപ്പില്ലാതെ പെൻഷൻ പരിഷ്കരണം; ഫ്രാൻസിൽ വൻ പ്രതിഷേധം
07:03 AM Mar 17, 2023 | Deepika.com