കൊച്ചി: ഇടവേളയ്ക്കുശേഷം തിരിച്ചെത്തുന്ന സൂപ്പർ കപ്പ് പോരാട്ടത്തിന്റെ തീയതിയും വേദിയും പ്രഖ്യാപിച്ചു. കൊച്ചി ജവഹർലാൽ നെഹ്റു സ്റ്റേഡിയം, കോഴിക്കോട് കോർപറേഷൻ സ്റ്റേഡിയം, മഞ്ചേരി പയ്യനാട് സ്റ്റേഡിയം എന്നിവിടങ്ങളിലായാണ് 2023 സൂപ്പർ കപ്പ് അരങ്ങേറുക.
കേരള ബ്ലാസ്റ്റേഴ്സ് എഫ്സിയുടെ മത്സരങ്ങൾക്ക് കൊച്ചി വേദിയാകും. ഏപ്രിൽ എട്ട് മുതൽ 25 വരെയാണ് സൂപ്പർ കപ്പ്.
ഐഎസ്എല്ലിലെ മുഴുവൻ ടീമുകളും 2022-23 ഐ ലീഗ് ചാന്പ്യന്മാരും 2023 സൂപ്പർ കപ്പിന് നേരിട്ടു യോഗ്യത നേടും. ശേഷിക്കുന്ന നാലു സ്ഥാനങ്ങൾക്കായി ഐ ലീഗ് ടീമുകൾ തമ്മിൽ പ്ലേ ഓഫ് നടക്കും. ഏപ്രിൽ മൂന്ന് മുതലാണ് യോഗ്യതാ റൗണ്ട് പോരാട്ടങ്ങൾ.
കൊച്ചിയിലെ മത്സരങ്ങൾ രാത്രി ഏഴിനും കോഴിക്കോട്, പയ്യനാട് എന്നിവിടങ്ങളിലെ മത്സരങ്ങൾ വൈകുന്നേരം നാലിനും ആയിരിക്കും ആരംഭിക്കുക.
ഏപ്രിൽ 21, 22 തീയതികളിലാണ് സെമി ഫൈനൽ പോരാട്ടങ്ങൾ. ഏപ്രിൽ 25ന് ഫൈനൽ അരങ്ങേറും. സൂപ്പർ കപ്പ് ജേതാക്കൾ 2021-22 ഐ ലീഗ് ചാന്പ്യന്മാരായ ഗോകുലം കേരള എഫ്സിയുമായി 2023-24 എഎഫ്സി കപ്പ് യോഗ്യതാ പോരാട്ടം നടക്കും.
സൂപ്പർ കപ്പ്: തീയതിയും വേദിയും പ്രഖ്യാപിച്ചു
01:34 AM Mar 03, 2023 | Deepika.com