കോൽക്കത്ത: ഐഎസ്എലിൽ കരുത്തരുടെ പോരാട്ടത്തിൽ മുംബൈ സിറ്റി എഫ്സിക്ക് ജയം. എടികെ മോഹൻബഗാനെ ഏകപക്ഷീയമായ ഒരു ഗോളിന് സിറ്റി പരാജയപ്പെടുത്തി. ലാലിയൻസുവാല ചാങ്തെയായിരുന്നു സിറ്റിയുടെ വിജയഗോൾ നേടിയത്. മത്സരത്തിന്റെ തുടക്കം മുതൽ ആക്രമിച്ചു കളിച്ച മുംബൈ സിറ്റിക്കായി 29 ാം മനിറ്റിലാണ് ചാങ്തെ വലകുലുക്കിയത്.
ആൽബെർട്ടോ നൊഗേര നൽകിയ ക്രോസ് സ്വീകരിച്ച ചാങ്തെ ബോക്സിനു തൊട്ടുവെളിയിൽ പോസ്റ്റിലേക്ക് പന്ത് തൊടുത്തു. വിശാൽ കെയ്തിനെ മറികടന്ന് പന്ത് വലയിൽ. ഗോൾ വീണതോടെ ഇരമ്പിക്കയറിയ എടികെയ്ക്കു മുന്നിൽ ഫുർബ ലചെൻപ വൻമതിൽ തീർത്തു. എടികെയുടെ ഉറച്ച ഗോൾ ശ്രമങ്ങളെല്ലാം ഫുർബ ലചെൻപയിൽ തട്ടിത്തെറിച്ചു.
തോൽവി അറിയാതെ മുന്നേറുന്ന മുംബൈ പോയിന്റ് ടേബിളിലെ ലീഡ് വീണ്ടും വർധിപ്പിച്ചു. 14 കളികളിൽ 36 പോയിന്റുമായി മുംബൈ തന്നെയാണ് മുന്നിൽ. രണ്ടാം സ്ഥാനത്തുള്ള ഹൈദരാബാദിന് ഇത്രയും കളികളിൽ 32 പോയിന്റാണുള്ളത്.
മുമ്പൻ സിറ്റി; ചാങ്തെ ഗോളിൽ എടികെയെ വീഴ്ത്തി മുംബൈ
09:53 PM Jan 14, 2023 | Deepika.com