ന്യൂഡല്‍ഹി: കേന്ദ്രബജറ്റില്‍ മധ്യവര്‍ഗത്തെ പരിഗണിക്കാന്‍ കേന്ദ്ര സര്‍ക്കാരിന് ആര്‍എസ്എസ് നിര്‍ദേശം. തൊഴിലില്ലായ്മയും വിലക്കയറ്റവും കാരണം മധ്യവര്‍ഗം അസംതൃപ്തിയിലാണ്. ഇവരുടെ പ്രശ്‌നങ്ങള്‍ പരിഹരിക്കാന്‍ അടുത്ത ബജറ്റില്‍ നടപടികള്‍ വേണമെന്നാണ് ആര്‍എസ്എസ് നിര്‍ദേശം നല്‍കിയത്.
കൊവിഡ് പ്രതിസന്ധിയിലും നോട്ടുനിരോധനവുംപോലെയുള്ള കടുത്ത തീരുമാനങ്ങളിലും കേന്ദ്ര സര്‍ക്കാരിനൊപ്പം നിന്നവരാണ് മധ്യവര്‍ഗക്കാര്‍. ഇവര്‍ക്ക് സര്‍ക്കാരില്‍ പ്രതീക്ഷയുണ്ട്. മധ്യവര്‍ഗത്തിന്‍റെ പ്രശ്‌നങ്ങൾക്കും വാര്‍ദ്ധക്യ പെന്‍ഷന്‍ പോലെയുള്ള സാമൂഹിക ക്ഷേമ പദ്ധതികള്‍ക്കും പരിഗണന നല്‍കണമെന്നാണ് നിര്‍ദേശം.
ഫെബ്രുവരി ഒന്നിന് നിലവിലെ ബിജെപി സര്‍ക്കാരിന്‍റെ അവസാന ബജറ്റ് അവതരിപ്പിക്കാനിരിക്കെയാണ് ആര്‍എസ്എസ് നീക്കം. രാജ്യത്തെ വിവിധയിടങ്ങളില്‍നിന്ന് ലഭിച്ച പ്രതികരണങ്ങളുടെ അടിസ്ഥാനത്തിലാണ് ഇത്തരത്തില്‍ ഒരാശയം മുന്നോട്ട് വച്ചതെന്നാണ് സൂചന.
കഴിഞ്ഞയിടെ രാജ്യത്തിന്‍റെ ദാരിദ്രാവസ്ഥയിലും തൊഴിലില്ലായ്മയിലും ആര്‍എസ്എസ് ജനറല്‍ സെക്രട്ടറി ദത്താത്രേയ ഹൊസബലെ ആശങ്ക പ്രകടിപ്പിച്ചിരുന്നു.
ബജറ്റില്‍ മധ്യവര്‍ഗത്തെ പരിഗണിക്കണം; കേന്ദ്രത്തിന് ആര്‍എസ്എസ് നിര്‍ദേശം
04:46 PM Jan 14, 2023 | Deepika.com