പത്തനംതിട്ട: തിരുവല്ല പായിപ്പാട് കുന്നന്താനത്ത് കത്തിക്കുത്തില് ഒരാള് മരിച്ചു. മുണ്ടിയപ്പള്ളി ഐക്കുഴി ചേറ്റേടത്ത് ചക്കുങ്കൽ വീട്ടിൽ സി.വി. സജീന്ദ്രനാണ് (സാജു-48) മരിച്ചത്. സംഭവത്തിൽ തടി വ്യാപാരിയായ മാന്താനം അടവിച്ചിറ മലങ്കാവിൽ വീട്ടിൽ സെബാസ്റ്റ്യൻ മാത്യുവി(കുമ്പക്കാട് പാപ്പച്ചൻ-63)നെ പോലീസ് അറസ്റ്റു ചെയ്തു.
പ്രതിയെ രക്ഷപ്പെടാൻ സഹായിച്ച പുളിന്താനം വെളളാംപൊയ്കയിൽ അനീഷ് മോനും പോലീസ് പിടിയിലായി. ശനിയാഴ്ച വൈകുന്നേരം നാലരയോടെ കുന്നന്താനം ടൗണിലാണ് സംഭവം. തടികച്ചവടക്കാരനായ സെബാസ്റ്റ്യനും തൊഴിലാളിയായ സജീന്ദ്രനും തമ്മിൽ ദീർഘകാലമായി അടുത്ത ബന്ധമുണ്ടായിരുന്നു.
ഇരുവരും തമ്മിൽ ടൗണിൽ തർക്കവും കൈയാങ്കളിയും ഉണ്ടായി. തുടർന്ന് സെബാസ്റ്റ്യൻ വാഹനത്തിൽ സൂക്ഷിച്ചിരുന്ന കത്തിയുമായി വന്ന് സജീന്ദ്രനെ കുത്തുകയായിരുന്നുവെന്നു പറയുന്നു. ഏറെ നേരം റോഡിൽ കിടന്ന സജീന്ദ്രനെ നാട്ടുകാരാണ് തിരുവല്ലയിലെ സ്വകാര്യ ആശുപത്രിയിൽ എത്തിച്ചത്.
തിരുവല്ലയില് കത്തിക്കുത്തില് ഒരാള് കൊല്ലപ്പെട്ടു
10:48 PM Jan 07, 2023 | Deepika.com