ചൊവ്വാഴ്ച വൈകുന്നേരം അഞ്ചോടെ ബെതുലിലെ മണ്ഡവി ഗ്രാമത്തിലെ കുഴൽക്കിണറിലാണ് തൻമയ് സാഹു വീണത്. കൃഷിസ്ഥലത്തോട് ചേർന്നുള്ള മൈതാനത്ത് കളിച്ചു കൊണ്ടിരിക്കെ 55 അടി താഴ്ചയുള്ള കിണറിലേക്ക് വീഴുകയായിരുന്നു. വിവരം അറിഞ്ഞതു മുതൽ രക്ഷാപ്രവർത്തനം നടത്തിവരികയായിരുന്നു.
മണ്ണ് നീക്കാനുള്ള യന്ത്രങ്ങൾ അപകട സ്ഥലത്ത് എത്തിച്ചായിരുന്നു രക്ഷാപ്രവർത്തനം. കുട്ടിക്ക് ഓക്സിജൻ നൽകാനുള്ള ക്രമീകരണങ്ങളും ഏർപ്പെടുത്തിയിരുന്നു. പക്ഷേ ജീവൻ രക്ഷിക്കാൻ സാധിച്ചില്ല. സംസ്ഥാന ദേശീയ ദുരന്തപ്രതികരണ സേനയുടെ ടീം ഉൾപ്പെടെ രക്ഷാപ്രവർത്തനത്തിനുണ്ടായിരുന്നു.
രണ്ട് വർഷം മുമ്പ് കുത്തിയ കുഴൽക്കിണർ വെള്ളം കാണാത്തതിനെത്തുടർന്ന് ഇരുമ്പ് പാളി കൊണ്ട് മൂടിയെന്നും കുട്ടി എങ്ങനെ വീണുവെന്ന് അറിയില്ലെന്നും സ്ഥലം ഉടമ പ്രതികരിച്ചിരുന്നു.