ശബരിമല: മണ്ഡലകാലം ആരംഭിച്ചശേഷം കെഎസ്ആര്‍ടിസി പമ്പ-നിലയ്ക്കല്‍ റൂട്ടിൽ നടത്തുന്ന ചെയിന്‍ സര്‍വീസിലൂടെ 10 കോടി രൂപയുടെ വരുമാനം നേടി. ഈ റൂട്ടില്‍ ബസുകളുടെ എണ്ണം 189 ആയി വര്‍ധിപ്പിച്ചു. നേരത്തെ 171 ബസുകളാണ് സർവീസ് നടത്തിയിരുന്നത്.
ശബരിമലയിലേക്കുള്ള ഭക്തജന പ്രവാഹം വര്‍ധിച്ചതോടെയാണ് വിവിധ ഡിപ്പോകളില്‍ നിന്ന് കൂടുതല്‍ ബസുകള്‍ എത്തിച്ചത്. രണ്ട് ദിവസത്തിനകം 15 എസി ലോ ഫ്ലോര്‍ ബസുകള്‍ കൂടി എത്തുമെന്ന് കെഎസ്ആര്‍ടിസി അധികൃതര്‍ അറിയിച്ചു. ഇതോടെ എസി ബസുകളുടെ എണ്ണം 60 ആകും. നിലവിൽ 45 എസി ബസുകൾ സർവീസ് നടത്തുന്നുണ്ട്.
തിങ്കളാഴ്ച മാത്രം 2,055 റൗണ്ട് സര്‍വീസുകളാണ് ഇരുഭാഗത്തേക്കുമായി കെഎസ്ആര്‍ടിസി നടത്തിയത്. നവംബര്‍ 30 വരെ ചെയിന്‍ സര്‍വീസിലൂടെ മാത്രം 10.94 ലക്ഷം പേര്‍ ശബരിമലയില്‍ എത്തി. നിലയ്ക്കല്‍-പമ്പ എസി ബസുകള്‍ക്ക് 80 രൂപയും മറ്റ് എല്ലാ സര്‍വീസുകള്‍ക്കും 50 രൂപയുമാണ് നിരക്ക്.
നിലയ്ക്കൽ-പമ്പ ചെയിന്‍ സര്‍വീസ്: കെഎസ്ആര്‍ടിസിക്ക് 10 കോടി വരുമാനം
07:10 PM Dec 06, 2022 | Deepika.com