തിരുവനന്തപുരം: കേരളത്തിന്റെ രാജ്യാന്തര ചലച്ചിത്ര വേദിയായ ഐഎഫ്എഫ്കെ ലൈഫ് ടൈം അച്ചീവ്മെന്റ് അവാർഡ് ഹംഗേറിയൻ സംവിധായകൻ ബേല താറിന്. 10 ലക്ഷം രൂപയും ശിൽപവും അടങ്ങുന്ന അവാർഡ് 16നു ചലച്ചിത്രമേളയുടെ സമാപനചടങ്ങിൽ സമ്മാനിക്കുമെന്നു മന്ത്രി വി.എൻ. വാസവൻ അറിയിച്ചു.
മാനുഷിക പ്രശ്നങ്ങളെ ദാർശിനികമായി സമീപിക്കുന്ന ബേലാ താറിന്റെ ആറു ചലച്ചിത്രങ്ങൾ മേളയിൽ പ്രദർശിപ്പിക്കും. ബേലാതാറിന്റെ ചലച്ചിത്ര ജീവിതത്തെ സമഗ്രമായി പരിചയപ്പെടുത്തുന്ന സി.എസ്. വെങ്കിടേശ്വരന്റെ കാലത്തിന്റെ ഇരുൾ ഭൂപടങ്ങൾ എന്ന പുസ്തകം ചലച്ചിത്ര അക്കാദമി പ്രസിദ്ധീകരിക്കും.
ഡിസംബർ ഒൻപതു മുതൽ 16 വരെ തിരുവനന്തപുരത്തു നടത്തുന്ന ചലച്ചിത്രമേളയിൽ 70 രാജ്യങ്ങളിൽ നിന്നുള്ള 184 സിനിമകൾ പ്രദർശിപ്പിക്കും. മലയാള സിനിമയിൽ നവതംരഗത്തിനു തുടക്കം കുറിച്ച അടൂർ ഗോപാലകൃഷ്ണന്റെ സ്വയംവരത്തിന്റെ അൻപതാം വാർഷികാഘോഷ വേളയിൽ ചിത്രത്തിന്റെ പ്രത്യേക പ്രദർശനവുമുണ്ടാകും.
ബേല താറിന് ഐഎഫ്എഫ്കെ ലൈഫ്ടൈം അച്ചീവ്മെന്റ് പുരസ്കാരം
09:29 PM Nov 29, 2022 | Deepika.com