തിരുവനന്തപുരം: കെപിസിസി അധ്യക്ഷന്റെ മനസ് ബിജെപിക്ക് ഒപ്പമാണെന്ന ബിജെപി സംസ്ഥാന അധ്യക്ഷൻ കെ. സുരേന്ദ്രന്റെ പ്രസ്താവനയ്ക്ക് മറുപടിയുമായി കെ. സുധാകരൻ. സുരേന്ദ്രൻ ആളും തരവും നോക്കി കളിക്കണമെന്നും ജീവനുള്ള ഒരു കോൺഗ്രസുകാരനും ബിജെപിയ്ക്കൊപ്പം പോകില്ലെന്നും സുധാകരൻ മറുപടിയായി പറഞ്ഞു.
സുരേന്ദ്രന്റെ വിഡ്ഢിത്തം കേട്ടവർ ഇപ്പോഴും ചിരി നിർത്തിക്കാണില്ല. എകെജി സെന്ററിൽ നിന്ന് തന്നെയാണ് സുരേന്ദ്രനും പ്രസ്താവനകൾ എഴുതി നൽകുന്നത് എന്നതിനുള്ള തെളിവാണ് ഇപ്പോൾ പുറത്താകുന്നത്. പിണറായിക്കും സഖാക്കൾക്കും സംഘിമനസാണ് ഉള്ളതെന്നും സുധാകരൻ പരിഹസിച്ചു.
സുധാകരന്റെ മനസ് ബിജെപിക്ക് ഒപ്പമാണ്. എന്നാൽ അദ്ദേഹത്തെ ബിജെപിയിലേക്ക് ക്ഷണിക്കുന്നില്ല. ഇവിടെ ഓഫറുകൾ ഒന്നും നൽകാൻ ഇല്ലാത്തതിനാലാണ് കോൺഗ്രസ് നേതാക്കൾ ബിജെപിയിലേക്ക് വരാത്തത്. സമാന ചിന്താഗതിക്കാർ കോൺഗ്രസിൽ നിരവധിപ്പേരുണ്ട്. കോൺഗ്രസ് നേതാക്കൾക്ക് വേറെ ഓപ്ഷൻ ഇല്ലാതായെന്നുമാണ് സുരേന്ദ്രൻ പറഞ്ഞത്.
സുരേന്ദ്രൻ ആളും തരവും നോക്കി കളിക്കണം; മറുപടിയുമായി കെ. സുധാകരൻ
04:21 PM Nov 15, 2022 | Deepika.com