ന്യൂഡൽഹി: നേമം ടെർമിനൽ, കൊച്ചുവേളി റെയിൽവേ സ്റ്റേഷൻ, തിരുവനന്തപുരം സെൻട്രൽ റെയിൽവേ സ്റ്റേഷൻ വികസനം തുടങ്ങിയ പദ്ധതികൾ ചർച്ച ചെയ്യുന്നതിന് കേരളത്തിൽ നിന്നും എത്തിയ മന്ത്രിമാരെ കാണാൻ അവസരം നൽകാതെ റെയിൽവേ മന്ത്രി അശ്വിനി വൈഷ്ണവ്. കൂടിക്കാഴ്ച അനുവദിക്കാത്തത് ജനാധിപത്യ വിരുദ്ധമാണെന്ന് ആരോപിച്ച മന്ത്രിമാർ പ്രധാനമന്ത്രിക്ക് പരാതി നൽകുമെന്നും പറഞ്ഞു.
സംസ്ഥാന തൊഴിൽ, വിദ്യാഭ്യാസ മന്ത്രി വി. ശിവൻകുട്ടി, ഗതാഗത വകുപ്പ് മന്ത്രി ആന്റണി രാജു, ഭക്ഷ്യ, സിവിൽ സപ്ലൈസ് വകുപ്പ് മന്ത്രി ജി.ആർ അനിൽ എന്നിവരാണ് മുൻകൂട്ടി നിശ്ചയിച്ചത് അനുസരിച്ച് കേന്ദ്ര റെയിൽ മന്ത്രിയുമായി കൂടിക്കാഴ്ച നടത്താൻ ഡൽഹിയിൽ എത്തിയത്.
എന്നാൽ റെയിൽവേ മന്ത്രിക്ക് പകരം കേന്ദ്ര റെയിൽവേ സഹമന്ത്രി ദർശന ജർദോഷ്, റെയിൽവേ ബോർഡ് ചെയർമാൻ എന്നിവരെയാണ് മന്ത്രിമാർക്ക് കാണാൻ സാധിച്ചത്. സിൽവർ ലൈൻ പദ്ധതിക്ക് ബദൽ സാധ്യതകൾ തേടിയും, നേമം ടെർമിനൽ വികസന പദ്ധതികൾ ചർച്ച ചെയ്യുന്നതിനും കേന്ദ്രമന്ത്രി വി. മുരളീധരന്റെ നേതൃത്വത്തിൽ ബിജെപി നേതാക്കൾ കഴിഞ്ഞ ദിവസം കേന്ദ്ര റെയിൽ മന്ത്രി അശ്വിനി വൈഷ്ണവുമായി കൂടിക്കാഴ്ച നടത്തിയിരുന്നു.
റെയിൽ മന്ത്രി കൂടിക്കാഴ്ച അനുവദിച്ചില്ല: പ്രധാനമന്ത്രിക്ക് പരാതി നൽകുമെന്ന് കേരള മന്ത്രിമാർ
10:44 PM Jul 28, 2022 | Deepika.com