മുംബൈ: മഹാരാഷ്ട്രയില്‍ ശിവസേനയിലെ ഔദ്യോഗികപക്ഷമെന്ന് അവകാശപ്പെടുന്ന ഇരുവിഭാഗങ്ങളും ഭൂരിപക്ഷം തെളിയിക്കാന്‍ രേഖകള്‍ ഹാജരാക്കണമെന്ന് കേന്ദ്ര തെരഞ്ഞെടുപ്പ് കമ്മീഷന്‍. ഓഗസ്റ്റ് എട്ടിനകം രേഖകള്‍ ഹാജരാക്കണമെന്നാണ് നിര്‍ദേശം.
ശിവസേനയുടെ ഔദ്യോഗിക ചിഹ്നം ആവശ്യപ്പെട്ട് ഉദ്ദവ് താക്കറെ പക്ഷവും, ഏക്‌നാഥ് ഷിന്‍ഡെ പക്ഷവും തെരഞ്ഞെടുപ്പ് കമ്മീഷനെ സമീപിച്ചിരുന്നു. താക്കറെ പക്ഷത്തിന്‍റെ കത്തില്‍ മറുപടി ആവശ്യപെട്ട് തെരഞ്ഞെടുപ്പ് കമ്മീഷന്‍ ഷിന്‍ഡെ പക്ഷത്തിന് കത്തയച്ചു. ഷിന്‍ഡെ പക്ഷത്തിന് മറുപടി നല്‍കണമെന്ന ആവശ്യം ഉന്നയിച്ച് താക്കറെ പക്ഷത്തിനും കത്തയച്ചു.
പാര്‍ട്ടി ഭാരവാഹികളുടെ ഒപ്പുകള്‍ ഉള്‍പ്പെടെ ശേഖരിച്ച് യഥാര്‍ഥ പാര്‍ട്ടി തങ്ങളാണെന്ന് തെളിയിക്കുന്ന രേഖകള്‍ ഇരുവിഭാഗങ്ങളും തെരഞ്ഞെടുപ്പ് കമ്മീഷനു മുന്നില്‍ സമര്‍പ്പിക്കണം. നിയമസഭയിലും ലോക്‌സഭയിലും വിമത വിഭാഗമായ ഷിന്‍ഡെ പക്ഷത്തിനാണ് നിലവില്‍ ഭൂരിപക്ഷമുള്ളത്. എന്നാല്‍ പാര്‍ട്ടി ഭാരവാഹികള്‍ തങ്ങളോടൊപ്പമാണെന്നാണ് താക്കറെ പക്ഷത്തിന്‍റെ അവകാശവാദം.
ശിവസേനയിലെ ഇരുവിഭാഗങ്ങളും ഭൂരിപക്ഷം തെളിയിക്കാന്‍ രേഖകള്‍ ഹാജരാക്കണം: തെരഞ്ഞെടുപ്പ് കമ്മീഷന്‍
01:28 PM Jul 23, 2022 | Deepika.com