തിരുവനന്തപുരം: സെക്രട്ടേറിയറ്റിലും പരിസരത്തും സിനിമ- സീരിയൽ- ഡോക്യുമെന്ററി ഉൾപ്പെടെയുള്ള ഷൂട്ടിംഗിനു നൽകില്ല. സെക്രട്ടേറിയറ്റിന് അകത്തും പരിസരത്തും സിനിമ ചിത്രീകരണത്തിന് അനുമതി ആവശ്യപ്പെട്ടു നിരവധി അപേക്ഷകൾ സർക്കാരിനു ലഭിക്കുന്ന സാഹചര്യത്തിലാണ് വ്യക്തത വരുത്തി ആഭ്യന്തര വകുപ്പ് ഉത്തരവിറക്കിയത്.
പ്രത്യേക സുരക്ഷാ മേഖലയായ സെക്രട്ടേറിയറ്റിനുണ്ടാകുന്ന സുരക്ഷാ പ്രശ്നങ്ങളും പുരാവസ്തു ഗണത്തിൽ പെടുന്ന കെട്ടിടങ്ങളുടെ സ്വാഭാവിക ഭംഗി നഷ്ടമാകുന്ന സാഹചര്യങ്ങളും കണക്കിലെടുത്താണ് സിനിമ ചിത്രീകരണം വിലക്കിയത്. ചിത്രീകരണ സമയത്ത് സിനിമ സംഘാംഗങ്ങളുടെയും വാഹനങ്ങളുടെയും ബാഹുല്യം, ഭക്ഷണ വിതരണം മൂലമുണ്ടാകുന്ന പ്രശ്നങ്ങൾ, സിനിമയ്ക്ക് അനുയോജ്യമായ രീതിയിൽ നിർമിതിയിൽ വരുത്തുന്ന മാറ്റം, പുറത്തു നിന്നുള്ളവരുടെ കടന്നു കയറ്റം, ഷൂട്ടിംഗിനു വരുന്നവരെ പരിശോധിച്ച് സുരക്ഷ ഉറപ്പു വരുത്തുന്നതിലെ അപ്രായോഗികത തുടങ്ങിയവയാണു പ്രധാന പ്രശ്നങ്ങളെന്നു ഉത്തരവിൽ പറയുന്നു.
എന്നാൽ, ഔദ്യോഗിക ആവശ്യങ്ങൾക്കായുള്ള ചിത്രീകരണങ്ങൾക്കു മാത്രം അനുമതി നൽകാം.
സെക്രട്ടേറിയറ്റ് സിനിമ ഷൂട്ടിംഗിനു നൽകില്ല; സർക്കാർ ഷൂട്ടിംഗ് ആകാം
07:48 PM Jul 15, 2022 | Deepika.com