കൊച്ചി: ലൈംഗിക പീഡന പരാതിയില് പോലീസ് കസ്റ്റഡിയിലെടുത്ത സിനിമ സംവിധായകൻ ലിജു കൃഷ്ണയുടെ അറസ്റ്റ് ഇന്നു രേഖപ്പെടുത്തിയേക്കും. 2020ൽ കാക്കനാട്ടെ ഫ്ലാറ്റിലും സ്വകാര്യ ഹോട്ടലുകളിലും വച്ച് നിരവധി തവണ പീഡിപ്പിച്ചുവെന്നാണ് കൊച്ചി സ്വദേശിനിയുടെ പരാതി.
കൊച്ചി ഡിസിപിയുടെ നേതൃത്വത്തിൽ ഞായറാഴ്ച നടത്തിയ ചോദ്യം ചെയ്യലിൽ വിവാഹ വാഗ്ദാനം നൽകി പീഡിപ്പിച്ചതായി ലിജു കൃഷ്ണൻ സമ്മതിച്ചിരുന്നു. ബന്ധത്തിൽനിന്നു പിന്മാറാൻ ശ്രമിച്ചതോടെയാണ് പരാതിയുമായി യുവതി രംഗത്തെത്തിയത്. ലിജു കൃഷ്ണയുടെ സിനിമയിൽ പ്രവർത്തിക്കുന്ന യുവതി തന്നെയാണ് പരാതിക്കാരി.
കണ്ണൂരിലെ സിനിമ ഷൂട്ടിംഗ് സെറ്റിൽനിന്നാണ് ലിജു കൃഷ്ണനെ ഇൻഫോ പാർക്ക് പോലീസ് കസ്റ്റഡിൽ എടുത്തത്. നിവിന് പോളിയും മഞ്ജു വാര്യരും പ്രധാന വേഷത്തിലെത്തുന്ന ‘പടവെട്ട്’ എന്ന സിനിമയുടെ സംവിധായകനാണ് ലിജു.
ലിജു കൃഷ്ണ ആദ്യമായി സംവിധാന ചെയ്യുന്ന ചിത്രമാണ് പടവെട്ട്. ചിത്രത്തിന്റെ തിരക്കഥയും ഇയാൾ തന്നെയാണ് നിർവഹിച്ചിരിക്കുന്നത്. സംഭവം വിവാദമായതോടെ തുടര്ചിത്രീകരണം നിര്ത്തിവച്ചു.
സണ്ണി വെയ്ൻ, ഷമ്മി തിലകൻ, അതിഥി ബാലൻ, ഷൈൻ ടോം ചാക്കോ, ഇന്ദ്രൻസ്, സുധീഷ്, വിജയരാഘവൻ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. സണ്ണി വെയ്ൻ ആദ്യമായി നിർമിക്കുന്ന ചിത്രമെന്ന പ്രത്യേകതയും ഇതിനുണ്ട്.
പീഡന പരാതി; "പടവെട്ട്' സംവിധായകന്റെ അറസ്റ്റ് ഇന്ന് രേഖപ്പെടുത്തിയേക്കും
08:51 AM Mar 07, 2022 | Deepika.com