ക്രൈസ്റ്റ്ചർച്ച്: ന്യൂസിലൻഡിനെതിരായ രണ്ടാം ക്രിക്കറ്റ് ടെസ്റ്റിൽ ദക്ഷിണാഫ്രിക്ക ജയത്തിലേക്ക്. 426 റണ്സ് വിജയലക്ഷ്യം പിന്തുടരുന്ന കിവീസ് നാലാം ദിനം കളിനിർത്തുമ്പോൾ 94/4 എന്ന നിലയിൽ പതറുകയാണ്.
60 റണ്സുമായി ഡെവണ് കോണ്വെ ക്രീസിലുള്ളത് കിവീസിന് ആശ്വാസമാണ്. ഒരു റണ്ണുമായി ടോം ബ്ലണ്ടൽ ആണ് കൂട്ടിന്. ഒരു ദിവസവും ആറ് വിക്കറ്റുകളും ശേഷിക്കേ കിവീസിന് ജയിക്കാൻ 332 റണ്സ് കൂടി വേണം.
മുൻനിര തകർന്നതാണ് തോൽവിയുടെ വക്കിലേക്ക് കിവീസിനെ തള്ളിയിട്ടത്. ടോം ലാതം (1), വിൽ യംഗ് (0), ഹെൻട്രി നിക്കോൾ (7), ഡാരിൽ മിച്ചൽ (24) എന്നിവരുടെ വിക്കറ്റുകളാണ് കിവീസിന് നഷ്ടമായത്. ദക്ഷിണാഫ്രിക്കയ്ക്കായി കഗീസോ റബാഡ, കേശവ് മഹാരാജ് എന്നിവർ രണ്ടുവീതം വിക്കറ്റുകൾ നേടി.
നേരത്തെ ദക്ഷിണാഫ്രിക്കയുടെ രണ്ടാം ഇന്നിംഗ്സ് 354/9 എന്ന നിലയിൽ ഡിക്ലയർ ചെയ്തിരുന്നു. 136 റണ്സുമായി പുറത്താകാതെ നിന്ന വിക്കറ്റ് കീപ്പർ ബാറ്റ്സ്മാൻ കെയിൽ വെരെയിനാണ് ദക്ഷിണാഫ്രിക്കയ്ക്ക് മികച്ച ലീഡ് സമ്മാനിച്ചത്. 47 റണ്സുമായി റബാഡയും തിളങ്ങി.
ക്രൈസ്റ്റ്ചർച്ച് ടെസ്റ്റിൽ ദക്ഷിണാഫ്രിക്ക ജയത്തിലേക്ക്
12:37 PM Feb 28, 2022 | Deepika.com