കണ്ണൂർ: കഴിഞ്ഞ ദിവസം തലശേരി ന്യൂമാഹിയിൽ നടന്നത് രാഷ്ട്രീയ കൊലപാതകമാണെന്ന് സ്ഥിരീകരിച്ച് പോലീസ്. സിപിഎം പ്രവര്ത്തകന് ഹരിദാസനോടുള്ള രാഷ്ട്രീയ വൈരാഗ്യമാണ് ആക്രമണത്തിലേക്കും കൊലയിലേക്കും നയിച്ചതെന്നാണ് പോലീസിന്റെ വിലയിരുത്തല്.
ഇതുവരെ ഹരിദാസിന്റേത് രാഷ്ട്രീയ കൊലപാതകമാണെന്ന് പോലീസ് സ്ഥിരീകരിച്ചിട്ടില്ലായിരുന്നു. ഇപ്പോഴാണ് ഇത് സംബന്ധിച്ച് പോലീസ് വ്യക്തത വരുത്തിയിരിക്കുന്നത്. പോലീസ് പുറത്തുവിട്ട പത്രകുറിപ്പിലാണ് ഇക്കാര്യം വ്യക്തമാക്കുന്നത്.
ജോലി കഴിഞ്ഞു മടങ്ങിയെത്തിയയുടൻ വീടിനു മുന്നിൽവച്ചാണ് പതിയിരുന്ന അക്രമി സംഘം ഹരിദാസനെ വെട്ടിവീഴ്ത്തിയത്. ഉടൻ തലശേരി സഹകരണ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
ഇടതുകാൽ വെട്ടിമാറ്റിയ നിലയിലായിരുന്നു. കാൽ പിന്നീട് പ്ലാസ്റ്റിക് കവറിൽ ആശുപത്രിയിലെത്തിക്കുകയായിരുന്നു. താഴെവയൽ പ്രദേശത്തെ ഉത്സസ്ഥലത്ത് കഴിഞ്ഞയാഴ്ച ഉണ്ടായ സംഘർഷമാണ് കൊലപാതകത്തിൽ കലാശിച്ചതെന്നാണ് പോലീസിന് ലഭിച്ച വിവരം.
സിപിഎം പ്രവർത്തകന്റേത് രാഷ്ട്രീയ കൊലപാതകം: സ്ഥിരീകരിച്ച് പോലീസ്
06:23 PM Feb 22, 2022 | Deepika.com