കോൽക്കത്ത: ഐപിഎൽ ടീം കോൽക്കത്ത നൈറ്റ് റൈഡേഴ്സിനെ ഇനി ശ്രേയസ് അയ്യർ നയിക്കും. ടീമിന്റെ പുതിയ നായകനായി ശ്രേയസിനെ ടീം മാനേജ്മെന്റ് പ്രഖ്യാപിച്ചു. കഴിഞ്ഞ ദിവസം നടന്ന താരലേലത്തിൽ 12.5 കോടി രൂപ മുടക്കിയാണ് താരത്തെ കോൽക്കത്ത നൈറ്റ് റൈഡേഴ്സ് ടീമിലെത്തിച്ചത്.
ദിനേശ് കാർത്തിക്കിന്റെ മോശം ഫോമിനെ തുടർന്ന് ഇംഗ്ലണ്ട് താരം എയിൻ മോർഗന്റെ കീഴിലാണ് കോൽക്കത്ത കഴിഞ്ഞ സീസണ് പൂർത്തിയാക്കിയത്. ഇരുവരെയും ടീം താരലേലത്തിന് മുൻപ് ഒഴിവാക്കിയിരുന്നു. തുടർന്നാണ് ഡൽഹി ക്യാപിറ്റൽസിന്റെ നായകനായി മുൻപരിചയമുള്ള ശ്രേയസിനെ താരലേലത്തിലൂടെ കോൽക്കത്ത സ്വന്തമാക്കിയത്.
ഡൽഹി ക്യാപിറ്റൽസിലൂടെ 2015-ലാണ് താരം ഐപിഎല്ലിൽ അരങ്ങേറിയത്. ഗൗതം ഗംഭീറിന്റെ പിൻഗാമിയായി 2018-ൽ നായക സ്ഥാനത്തെത്തി. തന്റെ നായകത്വത്തിൽ ഡൽഹിയെ 2019-ൽ പ്ലേ ഓഫിലും 2020-ൽ ഫൈനലിലും എത്തിച്ച ശ്രേയസിന് തൊട്ടടുത്ത വർഷം പരിക്ക് മൂലം ആദ്യപകുതിയിൽ കളിക്കാൻ കഴിഞ്ഞില്ല.
ഇതോടെ ഡൽഹി ഋഷഭ് പന്തിനെ നായകനാക്കി. പിന്നീട് ശ്രേയസ് തിരിച്ചുവന്നെങ്കിലും പന്തിനെ നായക സ്ഥാനത്ത് ടീം നിൽനിർത്തുകയായിരുന്നു.
ശ്രേയസ് അയ്യർ കോൽക്കത്ത നായകൻ
04:43 PM Feb 16, 2022 | Deepika.com