ന്യൂഡൽഹി: പാർലമെന്റ് നടപടികളുടെ തത്സമയ സംപ്രേഷണം നടത്തുന്ന സൻസദ് ടിവിയുടെ യുട്യൂബ് ചാനൽ ഹാക്ക് ചെയ്തു. ഹാക്കർമാർ ചാനൽ ഹാക്ക് ചെയ്യുകയും ചാനലിന്റെ പേര് മാറ്റുകയും ചെയ്തതിനെ തുടർന്ന് അക്കൗണ്ട് യൂട്യൂബ് സസ്പെൻഡ് ചെയ്തു.
പാർലമെന്റ് നടപടിക്രമങ്ങൾ പൊതുജനങ്ങൾക്കും ലഭ്യമാക്കുന്നതിന്റെ ഭാഗമായി ആരംഭിച്ചതാണ് സൻസദ് ടിവിയുടെ യുട്യൂബ് ചാനലും ഡിജിറ്റൽ സൻസദ് ആപ്പും. യൂട്യൂബിന്റെ കമ്മ്യൂണിറ്റി മാർഗ നിർദേശങ്ങൾ പാലിക്കാത്തതാണ് ചാനൽ നീക്കം ചെയ്തതിന്റെ കാരണമെന്നാണ് യൂട്യൂബിൽ നിന്നും ആദ്യം ലഭിച്ച വിശദീകരണം. എന്നാൽ ഒരു കൂട്ടം തട്ടിപ്പുകാരുടെ അനധികൃത പ്രവർത്തനം കാരണം ചാനൽ പൂർണമായും നിർത്തിവയ്ക്കുകയാണ് ഉണ്ടായതെന്ന് യുട്യൂബ് പിന്നീട് അറിയിച്ചു.
തട്ടിപ്പ് സംഘത്തിന്റെ പ്രവർത്തനങ്ങളുടെ ഫലമായി സൻസദ് ടിവിയുടെ യുട്യൂബ് അക്കൗണ്ടിന്റെ പ്രവർത്തനം നിർത്തിവച്ചതായും എഥിരിയം എന്ന പേരിലേക്ക് ഹാക്കർമാർ ചാനലിന്റെ പേര് മാറ്റിയതായും സൻസദ് ടിവി ഔദ്യോഗിക പ്രസ്താവന ഇറക്കി. രാത്രി ഒന്നോടെയാണ് ഇത് ശ്രദ്ധയിൽ പെട്ടതെന്നും എന്നാൽ പുലർച്ചെ നാലോടെ സൻസദ് ടിവിയുടെ സോഷ്യൽ മീഡിയ സംഘം അക്കൗണ്ട് പുനസ്ഥാപിച്ചതായും പ്രസ്താവനയിൽ പറയുന്നു.
സാങ്കേതിക സുരക്ഷാ കാര്യങ്ങളിൽ മേൽനോട്ടം നടത്തുന്ന ഇന്ത്യൻ കന്പ്യൂട്ടർ എമർജൻസി റെസ്പോണ്സ് ടീമാണ് സുരക്ഷാ ലംഘനം ശ്രദ്ധയിൽപെടുത്തിയത്. രാജ്യസഭ ടിവി എന്ന പേരിൽ സംപ്രേഷണം നടത്തിയിരുന്ന ചാനൽ കഴിഞ്ഞ വർഷം മുതലാണ് സൻസദ് ടിവി എന്ന പേരിൽ പുനർനാമകരണം ചെയ്തത്. യുട്യൂബിൽ സൻസദ് റടിവി അക്കൗണ്ടിന് 63 ലക്ഷത്തിൽ അധികം വരിക്കാരുണ്ട്.
സൻസദ് ടിവിയുടെ യുട്യൂബ് ചാനൽ ഹാക്ക് ചെയ്തു
11:35 PM Feb 15, 2022 | Deepika.com