പനാജി: ഐഎസ്എല്ലിൽ കരുത്തരായ ഹൈദരാബാദിനെ സമനിലയിൽ തളച്ച് ഈസ്റ്റ് ബംഗാൾ. ഓരോ ഗോൾ വീതം നേടിയാണ് ഇരുടീമുകളും പിരിഞ്ഞത്.
മത്സരത്തിന്റെ ഇരുപതാം മിനിറ്റിൽതന്നെ ഹൈദരാബാദിനെ ഞെട്ടിച്ച് ഈസ്റ്റ് ബംഗാൾ ഗോൾ നേടി. ആമിർ ഡെർവിസേവിച്ചാണ് ഈസ്റ്റ് ബംഗാളിനായി ഗോൾ കണ്ടെത്തിയത്. ഹൈദരാബാദ് പോസ്റ്റിന് തൊട്ടടുത്തുനിന്ന് ലഭിച്ച ഫ്രീകിക്ക് ഡെർവിസേവിച്ച് ലക്ഷ്യത്തിലെത്തിക്കുകയായിരുന്നു.
35-ാം മിനിറ്റിൽ സൂപ്പർ താരം ഓഗ്ബെച്ചെയിലൂടെ ഹൈദരാബാദ് ഗോൾ മടക്കി. അനികേത് ജാദവ് നൽകിയ ക്രോസ് ഒരു ഹെഡ്ഡറിലൂടെ ഓഗ്ബെച്ചെ ഈസ്റ്റ് ബംഗാളിന്റെ വലയിലെത്തിച്ചു.
ഇതോടെ ഇരു ടീമുകളും പോയിന്റ് പങ്ക് വച്ചു പിരിഞ്ഞു. ഏഴ് മത്സരത്തിൽനിന്ന് 12 പോയിന്റുമായി ഹൈദരാബാദ് ലീഗിൽ രണ്ടാം സ്ഥാനത്താണ്. നാല് പോയിന്റ് മാത്രമുള്ള ഈസ്റ്റ് ബംഗാൾ അവസാന സ്ഥാനത്തുമാണ്.
ഹൈദരാബാദിനെ സമനിലയിൽ തളച്ച് ഈസ്റ്റ് ബംഗാൾ
10:13 PM Dec 23, 2021 | Deepika.com