ഹൈദരാബാദ്: പെട്രോളിന്റെയും ഡീസലിന്റെയും മൂല്യവർധിത നികുതി കുറയ്ക്കാൻ സംസ്ഥാനങ്ങളോട് ആഹ്വാനം ചെയ്യാൻ ബിജെപിക്ക് ധാർമിക അവകാശമില്ലെന്ന് തെലുങ്കാന മുഖ്യമന്ത്രി ചന്ദ്രശേഖർ റാവു. പെട്രോളിയം ഉത്പന്നങ്ങളുടെ മേൽ ഏർപ്പെടുത്തിയിരിക്കുന്ന സെസ് നീക്കാൻ കേന്ദ്രം തയാറാകണമെന്ന് അദ്ദേഹം ആവശ്യപ്പെട്ടു.
പെട്രോളിയം ഉത്പന്നത്തിന്മേലുള്ള വാറ്റ് ടിആർഎസ് സർക്കാർ ഉയർത്തിയിട്ടില്ല. അതിനാൽ തന്നെ കുറയ്ക്കുമോയെന്ന ചോദ്യം ഉയരുന്നില്ല. പെട്രോളിന്റെയും ഡീസലിന്റെയും സെസ് പിൻവലിക്കണം. കേന്ദ്രം സെസ് പിൻവലിക്കുന്നതുവരെ സ്വസ്ഥമായി ഭരിക്കാൻ അനുവദിക്കില്ല. തെലുങ്കാനയിൽ ഉത്പാദിപ്പിക്കുന്ന മുഴുവൻ നെല്ലും കേന്ദ്രം സംഭരിക്കണമെന്നും അദ്ദേഹം ആവശ്യപ്പെട്ടു.
ടിആർഎസ് സർക്കാർ വന്നതിനു ശേഷം വാറ്റ് വർധിപ്പിച്ചിട്ടില്ല. ഒരു പൈസ പോലും കൂട്ടിയിട്ടില്ല. അതുകൊണ്ട് കുറയ്ക്കുമോ എന്ന ചോദ്യം ഉയരുന്നില്ല. ഏത് മണ്ടനാണ് വാറ്റ് കുറയ്ക്കാൻ ആവശ്യപ്പെടുക? അത് വർധിപ്പിച്ച മണ്ടൻ തന്നെ കുറയ്ക്കേണ്ടി വരും- കെസിആർ പറഞ്ഞു.
ഇന്ധനവില: കേന്ദ്രത്തിനെതിരെ ആഞ്ഞടിച്ച് കെസിആർ
10:08 AM Nov 08, 2021 | Deepika.com