തിരുവനന്തപുരം: രമേശ് ചെന്നിത്തലയുടെ പേര് പറയാൻ സ്വര്ണകടത്തു കേസിലെ പ്രതിയെ സമ്മർദം ചലുത്തിയെന്ന വെളിപ്പെടുത്തലിലൂടെ മറനീക്കിയത് പക വീട്ടാന് ഏതറ്റം വരെ പോകുന്ന പിണറായി വിജയന്റെ വൃത്തികെട്ട മനസാണെന്ന് കെപിസിസി അധ്യക്ഷൻ കെ. സുധാകരൻ.
പിണറായി സര്ക്കാരിനെ പ്രതിക്കൂട്ടിലാക്കിയ ഒട്ടേറെ വിവാദങ്ങള് പൊതുസമൂഹത്തിനു മുന്നില് ഉയര്ത്തിക്കൊണ്ടു വന്നതിന്റെ പകപോക്കലാണ് രമേശ് ചെന്നിത്തലയോട് നടത്തുന്നത്. പക വീട്ടാന് ഏതറ്റവും വരെ പോകുന്ന പിണറായി വിജയന്റെ വൃത്തികെട്ട മനസാണ് ഇതിലൂടെ മറനീക്കി വരുന്നത്.
ചെന്നിത്തല ഉള്പ്പെടെയുള്ളവരുടെ പേര് സ്വര്ണക്കടത്തില് ഉണ്ടെന്ന് വരുത്താന് പൂജപ്പുര സെന്ട്രല് ജയിലിലെ ഉദ്യോഗസ്ഥര് സ്വര്ണകടത്തു കേസിലെ പ്രതിക്കു മേല് സമ്മര്ദ്ദം ചെലുത്തിയെന്ന വെളിപ്പെടുത്തല് ഞെട്ടിപ്പിക്കുന്നതാണ്. നയതന്ത്രചാനലിലൂടെ നടത്തിയ സ്വര്ണക്കടത്തു കേസിലെ പ്രധാന പ്രതികളിലൊരാളായ സരിത്തിനെ കൊണ്ട് ഇത്തരമൊരു മൊഴി ഉണ്ടാക്കുന്നതിനാണ് ജയിലുദ്യോഗസ്ഥരില് ചിലര് സമ്മര്ദ്ദം ചെലുത്തിയത്. അതിനു വഴങ്ങാതിരുന്ന സരിത്തിനെ ജയിലിനകത്ത് ഭീഷണിപ്പെടുത്തിയെന്നും അദ്ദേഹത്തിന്റെ അഭിഭാഷകന് കോടതിയെ അറിയിച്ചിരിക്കുകയാണ്.
ചെന്നിത്തലയെ പോലൊരു നേതാവിന്റെ പ്രതിഛായ തകര്ത്ത് ഈ അധോലോകറാക്കറ്റിന്റെ ഭാഗമാണ് പ്രതിപക്ഷത്തുള്ളവരുമെന്ന് വരുത്താനുള്ള പിണറായി വിജയന്റെ ശ്രമം വിലപ്പോവില്ല. സര്ക്കാരിന്റെ ശമ്പളം പറ്റി പിണറായി വിജയനും സിപിഎമ്മിനും വേണ്ടി വിടുപണിയെടുക്കുന്ന ഉദ്യോഗസ്ഥരെ നിയമത്തിന്റെ വഴിയില് കൈകാര്യം ചെയ്യേണ്ടി വരും. സരിത്തിനെ പൂജപ്പുര സെന്ട്രല് ജയിലില് നിന്നു മാറ്റാനും വ്യാജമൊഴി സൃഷ്ടിക്കാനായി ഭീഷണിപ്പെടുത്തിയ ഉദ്യോഗസ്ഥര്ക്കെതിരേ നടപടിയെടുക്കാനും തയാറാകണമെന്നും സുധാകരൻ ആവശ്യപ്പെട്ടു.
പിണറായി ചെന്നിത്തലയോട് പകപോക്കുന്നു: കെ. സുധാകരൻ
06:24 PM Jul 11, 2021 | Deepika.com