ലക്നോ: ഇന്ത്യയുടെ വികല ഭൂപടം പ്രസിദ്ധീകരിച്ചതിന് ട്വിറ്റർ ഇന്ത്യ എംഡിക്കെതിരെ കേസ്. യുപി പോലീസാണ് ട്വിറ്റർ ഇന്ത്യ മാനേജിംഗ് ഡയറക്ടർ മനീഷ് മഹേശ്വരിക്കെതിരെ കേസെടുത്തിരിക്കുന്നത്. ബജ്രംഗ്ദൾ നേതാവിന്റെ പരാതിയിലാണ് നടപടി. ഐപിസിയുടെ സെക്ഷൻ 505 (2), ഐടി (ഭേദഗതി) ആക്റ്റ് 2008 ലെ സെക്ഷൻ 74 എന്നിവ പ്രകാരമാണ് കേസെടുത്തിരിക്കുന്നത്.
അതേസമയം ഇന്ത്യയുടെ തെറ്റായ ഭൂപടം ഔദ്യോഗിക പേജില് നിന്ന് ട്വിറ്റർ പിൻവലിച്ചിരുന്നു. ഭൂപടം വിവാദമായതിന് പിന്നാലെയാണ് ട്വിറ്ററിന്റെ നടപടി. എന്നാൽ ഇക്കാര്യത്തിൽ ട്വിറ്റർ വിശദീകരണമൊന്നും നൽകിയിട്ടില്ല.
ജമ്മു കാഷ്മീരും ലഡാക്കും ഇല്ലാത്ത ഇന്ത്യയുടെ തെറ്റായ ഭൂപടമാണ് ട്വിറ്റർ നൽകിയിരുന്നത്. മെക്രോ ബ്ലോഗിംഗ് പ്ലാറ്റ്ഫോമിലെ കരിയർ വിഭാഗത്തിൽ ദൃശ്യമാകുന്ന ഭൂപടത്തിലാണ് വിവാദ നടപടിയുണ്ടായത്. ട്വിറ്ററുമായി കേന്ദ്രസർക്കാർ ഇടഞ്ഞുനിൽക്കുന്നതിനിടെയാണ് പുതിയ സംഭവമുണ്ടായത്.
ഇതാദ്യമായല്ല ട്വിറ്റര് ഇന്ത്യയുടെ വികലമായ ഭൂപടം കാണിക്കുന്നത്. ജമ്മു കാഷ്മീരിലെ ലേ പ്രദേശം ട്വിറ്റര് നേരത്തേ അടയാളപ്പെടുത്തിയത് ചൈനയുടെ ഭാഗമായാണ്. ഇതിനെതിരേ കേന്ദ്രം കടുത്ത എതിർപ്പ് അറിയിക്കുകയും ചെയ്തിരുന്നു.
ട്വിറ്റർ ഇന്ത്യ എംഡിക്കെതിരെ കേസ്
07:57 AM Jun 29, 2021 | Deepika.com