റിയോ ഡി ഷാനെയ്റോ: കോപ്പ അമേരിക്കയിൽ ഗ്രൂപ്പ് എ-യിൽ നടന്ന വെനസ്വേല-ഇക്വഡോർ പോരാട്ടം സമനിലയിൽ. ഇരു ടീമുകളും രണ്ട് ഗോളുകൾ വീതം നേടി. മത്സരത്തിന്റെ ഇൻജുറി ടൈമിൽ നേടിയ ഗോളിലൂടെയാണ് വെനസ്വേല സമനില പിടിച്ചത്.
ഇക്വഡോറാണ് ആദ്യം ലീഡ് നേടിയത്. 39-ാം മിനിറ്റിൽ അയർടണ് പ്രെസിയാഡോയാണ് ഇക്വഡോറിനായി സ്കോർ ചെയ്തത്. രണ്ടാം പകുതിയുടെ തുടക്കത്തിൽ തന്നെ വെനസ്വേല സമനില കണ്ടെത്തി. 51-ാം മിനിറ്റിൽ എഡ്സണ് കാസ്റ്റില്ലോയാണ് സമനില ഗോൾ നേടിയത്.
വെനസ്വേല സമനില കണ്ടെത്തിയതോടെ ഇക്വഡോർ വീണ്ടും ആക്രമണം കടുപ്പിച്ചു. 71-ാം മിനിറ്റിൽ ഇക്വഡോറിന്റെ ആക്രമണത്തിന് ഫലം കണ്ടു. ഗോണ്സാലോ പ്ലാറ്റ വീണ്ടും ഇക്വഡോറിന്റെ ലീഡ് ഉയർത്തി.
ഇക്വഡോർ വിജയമുറപ്പിച്ച് നിൽക്കേ ഇൻജുറി ടൈമിന്റെ ആദ്യ മിനിറ്റിൽ റൊണാൾഡ് ഹെർണാണ്ടസിലൂടെയാണ് വെനസ്വേല സമനില ഗോൾ കണ്ടെത്തിയത്.
വെനസ്വേല-ഇക്വഡോർ പോരാട്ടം സമനിലയിൽ
06:01 AM Jun 21, 2021 | Deepika.com