ന്യൂഡൽഹി: രാജ്യത്തെ ഇന്ധനവില വര്ധനയ്ക്കെതിരെ കോണ്ഗ്രസ് രാജ്യവ്യാപക പ്രതിഷേധത്തിനൊരുങ്ങുന്നു. ജൂൺ 11ന് രാജ്യവ്യാപകമായി പ്രതീകാത്മക പ്രതിഷേധം നടത്തുമെന്ന് പാർട്ടി അറിയിച്ചു. പെട്രോൾ പമ്പുകൾക്ക് മുമ്പിലാണ് പ്രതിഷേധം സംഘടിപ്പിക്കുക.
അതേസമയം, രാജ്യത്ത് ഇന്ധന വില ഇന്നും കൂടി. പെട്രോളിന് 25 പൈസയും ഡീസലിന് 37 പൈസയുമാണ് ബുധനാഴ്ച കൂട്ടിയത്. 37 ദിവസത്തിനിടെ 22 തവണയാണ് ഇന്ധനവില വർധിപ്പിച്ചിരിക്കുന്നത്.
കൊച്ചി പെട്രോൾ ലിറ്ററിന് 95.66 രൂപയും ഡീസലിന് 91.13 രൂപയുമാണ് പുതിയ ഇന്ധനവില. തിരുവനന്തപുരം പെട്രോളിന് 97.54 രൂപയും ഡീസലിന് 92.90 രൂപയുമാണ്. കോഴിക്കോട് പെട്രോളിന് 95.95 രൂപയും ഡീസൽ 91.31 രൂപയുമാണ് ഇന്നത്തെ വില.
രാജ്യത്തിന്റെ പല ഭാഗത്തും ഇന്ധന വില ഇതിനോടകം നൂറ് കവിഞ്ഞു. കോവിഡും ലോക്ഡൗണും മൂലം ജനങ്ങള് കനത്ത പ്രതിസന്ധിയിലായ സമയത്താണ് ഇരുട്ടടിയായി ഇന്ധനവില കുതിച്ചുയരുന്നത്.
ഇന്ധനവില വര്ധന: കോണ്ഗ്രസ് രാജ്യവ്യാപക പ്രതിഷേധം നടത്തും
08:03 AM Jun 09, 2021 | Deepika.com