ന്യൂഡൽഹി: കോവിഡ് വാക്സീൻ വിതരണത്തിന് അനുമതി നൽകിയതോടെ കോവിഷീൽഡ് വാക്സീന് കേന്ദ്ര സർക്കാർ പർച്ചേസ് ഓർഡർ നൽകി. ഓർഡർ കിട്ടിയെന്ന് കോവിഷീൽഡ് നിമാതാക്കളായ സിറം ഇൻസ്റ്റിറ്റ്യൂട്ട് സ്ഥിരീകരിച്ചു. വാക്സീൻ 200 രൂപ നിരക്കിൽ ലഭ്യമാക്കുമെന്നും സിറം അധികൃതർ വ്യക്തമാക്കി.
രാജ്യത്ത് കോവിഡ് വാക്സീൻ വിതരണം ശനിയാഴ്ച തുടങ്ങുമെന്ന് പ്രധാനമന്ത്രി നരേന്ദ്ര മോദി നേരത്തെ വ്യക്തമാക്കിയിരുന്നു. രാജ്യത്തിന് ഇത് അഭിമാനനിമിഷമാണെന്നും മോദി പറഞ്ഞു. മുഖ്യമന്ത്രിമാരുടെ യോഗത്തിലാണ് പ്രധാനമന്ത്രി ഇക്കാര്യം അറിയിച്ചത്.
രണ്ട് വാക്സീനുകൾക്ക് ശാസ്ത്രീയാനുമതി കിട്ടി. രണ്ടും ലോകത്തിൽ ഏറ്റവും വില കുറഞ്ഞതാണ്. നാലിൽ കൂടുതൽ വാക്സീനുകൾ പരീക്ഷണഘട്ടത്തിലുണ്ടെന്നും വാക്സീൻ വിതരണം ഫെഡറൽ സംവിധാനത്തിന്റെ മഹനീയ മാതൃകയാകുമെന്നും മോദി പറഞ്ഞു.
മൂന്ന് കോടി കോവിഡ് മുന്നണി പോരാളികൾക്ക് ആദ്യഘട്ടത്തിൽ വാക്സീൻ നൽകും. കോവിഡ് വാക്സീനുകൾ മരുന്ന് കന്പനികളിൽ നിന്ന് കേന്ദ്രം വാങ്ങി നൽകും. ആദ്യഘട്ടത്തിലെ ചെലവ് കേന്ദ്രസർക്കാർ വഹിക്കുമെന്നും മോദി വ്യക്തമാക്കി.
കോവിഷീൽഡിനായി ഓർഡർ നൽകി കേന്ദ്രം
06:05 PM Jan 11, 2021 | Deepika.com