കാസർഗോഡ്: വിവിധ സാമൂഹ്യ ക്ഷേമ പെൻഷൻ വാങ്ങുന്നവർ ജനുവരി ഒന്നു മുതൽ മാർച്ച് 20 വരെ അക്ഷയ കേന്ദ്രങ്ങളിൽ മസ്റ്ററിംഗ് നടത്തണമെന്ന പ്രചാരണം അടിസ്ഥാനരഹിതമാണെന്ന് അക്ഷയ സ്റ്റേറ്റ് പ്രോജക്ട് ഡയറക്ടർ അറിയിച്ചു.
വാർധക്യകാല പെൻഷൻ, വിധവ അവിവാഹിത പെൻഷൻ, വികലാംഗ പെൻഷൻ, കർഷക തൊഴിലാളി പെൻഷൻ തുടങ്ങി സാമൂഹ്യ ക്ഷേമ പെൻഷൻ വാങ്ങിക്കുന്നവർ മസ്റ്ററിംഗ് നടത്തണം എന്ന രീതിയിൽ സാമൂഹിക മാധ്യമങ്ങളിൽ പ്രചരിക്കുന്ന സന്ദേശങ്ങൾ ശരിയല്ല.
മസ്റ്ററിംഗ് പ്രവർത്തനങ്ങൾ മാസങ്ങൾക്കു മുന്പ് പൂർത്തിയായിരുന്നു. അക്ഷയ കേന്ദ്രങ്ങളിൽ പോയി മസ്റ്ററിംഗ് നടത്തണമെന്ന നിർദ്ദേശം ഒൗദ്യോഗികമായി നൽകിയിട്ടില്ല. ഇത്തരത്തിൽ സമൂഹമാധ്യമങ്ങളിലൂടെ വ്യാജവാർത്തകൾ പ്രചരിപ്പിക്കുന്നവർക്കെതിരെ ശക്തമായ നിയമനടപടി സ്വീകരിക്കുമെന്നും ഡയറക്ടർ പറഞ്ഞു.
കോവിഡിന്റെ സാഹചര്യത്തിൽ അനിയന്ത്രിതമായ ആൾക്കൂട്ടങ്ങൾ അക്ഷയ കേന്ദ്രത്തിൽ അനുവദിക്കില്ല. സംസ്ഥാന സർക്കാരും ആരോഗ്യവകുപ്പും നിർദ്ദേശിച്ചിരിക്കുന്ന കോവിഡ് മാനദണ്ഡങ്ങൾ പാലിക്കാൻ ജനങ്ങൾ സഹകരിക്കണമെന്നും ഡയറക്ടർ അറിയിച്ചു.
സാമൂഹ്യക്ഷേമ പെൻഷൻ വാങ്ങുന്നവർ മസ്റ്ററിംഗ് നടത്തണോ?; അറിയേണ്ട കാര്യങ്ങള്
12:53 PM Jan 06, 2021 | Deepika.com