ലക്നോ: സവർണജാതിയുടെ പേരെഴുതിയ ഷൂ വിറ്റെന്നാരോപിച്ചു മുസ്ലിം യുവാവിനെ പോലീസ് അറസ്റ്റ് ചെയ്തു. ഉത്തർപ്രദേശ് ബുലന്ദ്ഷഹറിൽ ചൊവ്വാഴ്ചയാണു സംഭവം.
നസീർ എന്ന യുവാവിനെയാണു പോലീസ് കസ്റ്റഡിയിലെടുത്തത്. സംസ്ഥാനത്തെ സവർണജാതി വിഭാഗമായ "ഠാക്കുർ’ എന്നെഴുതിയ ഷൂ വിറ്റതാണ് ഇയാൾക്കെതിരായ കുറ്റം. ഗുലോത്തിയിലെ ബജ്രംഗ്ദൾ കോർഡിനേറ്ററായ വിശാൽ ചൗഹാനാണു നസീറിനെതിരേ പോലീസിൽ പരാതി നൽകിയത്.
നസീറിനെ പോലീസ് അറസ്റ്റ് ചെയ്യുന്ന വീഡിയോയും പുറത്തുവന്നിട്ടുണ്ട്. ഷൂ നിർമാതാക്കളാണു ഠാക്കുർ എന്ന് ഷൂവിൽ പതിപ്പിച്ചതെന്നും താൻ ഷൂ വിൽക്കുക മാത്രമാണ് ചെയ്തതെന്നും നസീർ പറയുന്നതു വീഡിയോയിൽ കേൾക്കാം. ഇക്കാര്യങ്ങൾ പരിഗണിക്കാതെയാണു പോലീസ് നടപടി സ്വീകരിക്കുന്നത്.
നസീറിനെതിരേയും ആഗ്രയിലെ ഠാക്കുർ ഫുട്ട്വെയർ കന്പനിക്കെതിരേയും പോലീസ് കേസെടുത്തിട്ടുണ്ട്. മതസ്പർധയുണ്ടാക്കുന്ന തരത്തിൽ പ്രവർത്തിച്ചു, പൊതുസമാധാനത്തിനു വിരുദ്ധമായി പ്രവർത്തിച്ചു എന്നീ വകുപ്പുകളിലാണു കേസ്.
സവർണജാതിയുടെ പേരെഴുതിയ ഷൂ വിറ്റു; യുപിയിൽ മുസ്ലിം യുവാവിനെതിരേ കേസ്
12:27 PM Jan 06, 2021 | Deepika.com