ഭൂവനേശ്വർ: ഭിന്നശേഷിക്കാരെ വിവാഹം ചെയ്യുന്നവർക്ക് പാരിതോഷികമായി പണം നൽകാൻ ഒഡീഷ സർക്കാർ. രണ്ടര ലക്ഷം രൂപ നൽകാനാണ് സർക്കാർ തീരുമാനം. വൈകല്യമുള്ള വ്യക്തികളും സാധാരണക്കാരും തമ്മിലുള്ള വിവാഹം പ്രോത്സാഹിപ്പിക്കുന്നതിന്റെ ഭാഗമായാണ് പുതിയ പദ്ധതി.
ഭിന്നശേഷിക്കാരും സാധാരണക്കാരും തമ്മിലുള്ള വിവാഹത്തില് 50,000 രൂപ നേരത്തെ തന്നെ സര്ക്കാര് നല്കി വരുന്നുണ്ട്. ഇതിനു തുടർച്ചയെന്നോണമാണ് പുതിയ പദ്ധതി ആവിഷ്ക്കരിച്ചിരിക്കുന്നത്. സാമൂഹികമായ ഐക്യം വര്ധിപ്പിക്കുന്നതിനും വൈകല്യമുള്ള വ്യക്തികളുടെ സാമൂഹിക സുരക്ഷയും ശാക്തീകരണവും ഉറപ്പു വരുന്നതിനുള്ള വകുപ്പാണ്(എസ്എസ്ഇപിഡി) ഈ ആശയം അവതരിപ്പിച്ചത്.
ഭിന്നശേഷിക്കാരുമായുള്ള വിവാഹബന്ധം പ്രോത്സാഹിപ്പിക്കുന്നതിനും ഭിന്നശേഷിക്കാര്ക്കും സാധാരണ വിവാഹജീവിതം നയിക്കാനുള്ള അവസരം ഒരുക്കുന്നതിനുമാണ് ഈ പദ്ധതിയെന്ന് സർക്കാരിന്റെ ഔദ്യോഗിക വക്താവ് അറിയിച്ചു.
ആനുകൂല്യം ലഭിക്കുന്നതിന് വരനും വധുവിനും യഥാക്രമം 21 ഉം 18 ഉം വയസ് പൂര്ത്തിയായവരും നേരത്തെ ഈ ധനസഹായം കൈപ്പറ്റാത്തവരും ആയിരിക്കേണ്ടതുണ്ട്. വിവാഹം സ്ത്രീധനമുക്തമായിരിക്കേണ്ടതും ആവശ്യമാണ്.
വിവാഹസര്ട്ടിഫിക്കറ്റോടു കൂടിയാണ് അപേക്ഷ നല്കേണ്ടത്. മുന്ന് വര്ഷത്തേക്കുള്ള സ്ഥിരനിക്ഷേപമായാണ് ധനസഹായം നല്കുന്നത്. അതിന് ശേഷം ഇരുവർക്കും സംയുക്തമായി പണം പിൻവലിക്കാം.
ഭിന്നശേഷിക്കാരെ വിവാഹം ചെയ്യുന്നവർക്ക് ധന സഹായം നൽകാൻ ഒഡീഷ സർക്കാർ
02:56 PM Jan 03, 2021 | Deepika.com