ന്യൂഡൽഹി: കേന്ദ്രസർക്കാർ നിരോധിച്ച പബ്ജി ഗെയിം പുതിയ രൂപത്തിൽ ഇന്ത്യയിൽ അവതരിപ്പിക്കുമെന്ന് പബ്ജി കോർപ്പറേഷൻ. പബ്ജി മൊബൈൽ ഇന്ത്യ എന്ന പേരിൽ പുതിയ ഗെയിം അവതരിപ്പിക്കാനാണ് മൊബൈൽ ഗെയിം വികസിപ്പിച്ച പബ്ജി കോർപറേഷന്റെ തീരുമാനം.
സുരക്ഷാ കാരണങ്ങളാൽ സെപ്റ്റംബറിലാണ് യുവജനങ്ങളുടെ ഇഷ്ട മൊബൈൽ ഗെയിമായ പബ്ജി കേന്ദ്രസർക്കാർ നിരോധിച്ചത്. ചൈനീസ് ഗെയിമിങ്ങ് ആപ്പ് വ്യക്തികളുടെ സ്വകാര്യ വിവരങ്ങൾ ചോർത്തുന്നു എന്ന് ചൂണ്ടിക്കാണിച്ചായിരുന്നു കേന്ദ്രസർക്കാരിന്റെ നടപടി.
നിരോധിച്ചതിന് പിന്നാലെ ചൈനീസ് കന്പനിയുമായുള്ള ബന്ധം വിച്ഛേദിക്കുമെന്ന് മാതൃകന്പനിയായ പബ്ജി കോർപ്പറേഷൻ പ്രഖ്യാപനം നടത്തിയിരുന്നു. ഇന്ത്യൻ വിപണിക്ക് അനുയോജ്യമായ രീതിയിൽ ഗെയിം അവതരിപ്പിക്കാനാണ് ആലോചിക്കുന്നതെന്ന് കന്പനി അറിയിച്ചു.
പബ്ജി മൊബൈൽ ഇന്ത്യ എന്ന പേരിലുള്ള ഗെയിം ഉപയോഗിക്കുന്നവരുടെ സ്വകാര്യ വിവരങ്ങളുടെ സുരക്ഷയ്ക്ക് പരമാവധി പ്രാധാന്യം നൽകിയിട്ടുണ്ട്. രാജ്യത്തെ നിയമങ്ങൾ അനുസരിച്ചാണ് പുതിയ ഗെയിം ഒരുക്കുന്നതെന്നും കന്പനി അറിയിച്ചു.
ഗെയിമിന്റെ ഉള്ളടക്കത്തിൽ മാറ്റം വരുത്തും. പ്രാദേശിക പ്രതീതി തോന്നുന്നവിധം ഉള്ളടക്കം പരിഷ്കരിക്കും. വിർച്വൽ സിമുലേഷൻ തുടങ്ങി പുത്തൻ സാങ്കേതികവിദ്യകൾ പ്രയോജനപ്പെടുത്തും. ഗെയിമിന്റെ സമയം നിയന്ത്രിക്കുന്നതിനുള്ള ഫീച്ചറും പുതുതായി അവതരിപ്പിക്കുമെന്നും പബ്ജി കോർപ്പറേഷൻ അറിയിച്ചു.
നിരോധിക്കാം, ഇല്ലാതാക്കാനാവില്ല! പബ്ജിയുടെ ഇന്ത്യൻ പതിപ്പ് വരുന്നു
08:20 PM Nov 12, 2020 | Deepika.com