മുംബൈ: മഹാരാഷ്ട്രയിൽ സ്കൂളുകൾ തുറക്കുന്നു. നവംബർ 23നാണ് സ്കൂൾ തുറക്കുന്നത്. ഒൻപതുമുതലുള്ള ക്ലാസുകളാണ് തുറക്കുന്നതെന്ന് വിദ്യാഭ്യാസ മന്ത്രി വർഷ ഗെയ്ക്വാദ് പറഞ്ഞു.
സുരക്ഷാ മാനദണ്ഡങ്ങളോടെയാണ് സ്കൂളുകൾ തുറക്കുന്നത്. തെർമൽ സ്കാനിംഗിനുശേഷമായിരിക്കും വിദ്യാർഥികളെ ക്ലാസ് മുറികളിൽ പ്രവേശിപ്പിക്കുന്നതെന്നും ഗെയ്ക്വാദ് പറഞ്ഞു.
ദീപാവലിക്കുശേഷം നാം കൂടുതൽ ജാഗ്രത പാലിക്കേണ്ടതുണ്ടെന്ന് മുഖ്യമന്ത്രി ഉദ്ധവ് താക്കറെ പറഞ്ഞു. സ്കൂളുകളിലെ ക്വാറന്റൈൻ കേന്ദ്രങ്ങൾ അടയ്ക്കാൻ സാധിക്കില്ല. അതിനാൽ ക്ലാസ് മുറികൾക്കുള്ള ഇതര സ്ഥലങ്ങൾ സംബന്ധിച്ച് പ്രാദേശിക ഭരണകൂടത്തിന് തീരുമാനമെടുക്കാം.
സ്കൂളുകളുടെ ശുചിത്വം, അധ്യാപകർക്കുള്ള കോവിഡ് പരിശോധന, മറ്റ് മുൻകരുതലുകൾ എന്നിവ അനിവാര്യമാണെന്നും മുഖ്യമന്ത്രി പറഞ്ഞു.
രോഗികളായ വിദ്യാർഥികളോ, കുടുംബത്തിൽ ആർക്കെങ്കിലും രോഗം ഉണ്ടെങ്കിലോ ആ വിദ്യാർഥികൾ സ്കൂളുകളിലേക്ക് വരരുതെന്നും മുഖ്യമന്ത്രി കൂട്ടിച്ചേർത്തു.
മഹാരാഷ്ട്രയിൽ സ്കൂളുകൾ തുറക്കുന്നു
05:25 AM Nov 08, 2020 | Deepika.com