ദുബായ്: ഐപിഎല്ലിൽ സണ്റൈസേഴ്സ് ഹൈദരാബാദിനെതിരേ ചെന്നൈ സൂപ്പര് കിംഗ്സിന് 165 റണ്സ് വിജയലക്ഷ്യം. ടോസ് നേടി ആദ്യം ബാറ്റ് ചെയ്ത ഹൈദരാബാദ് നിശ്ചിത 20 ഓവറില് അഞ്ചു വിക്കറ്റ് നഷ്ടത്തില് 164 റണ്സെടുത്തു. 26 പന്തിൽ 51 റൺസെടുത്ത പ്രിയം ഗാർഗാണ് ടോപ് സ്കോറർ.
ഹൈദരാബാദിന് ആദ്യ ഓവറില് തന്നെ വിക്കറ്റ് നഷ്ടമായി. ഓപ്പണര് ജോണി ബെയര്സ്റ്റോ റൺസൊന്നും എടുക്കാതെ മടങ്ങി. ക്യാപ്റ്റന് ഡേവിഡ് വാര്ണറും മനീഷ് പാണ്ഡെയും ഇന്നിംഗ്സ് മുന്നോട്ടുകൊണ്ടു പോകവെ എട്ടാം ഓവറില് ഷാര്ദുല് താക്കൂര് പാണ്ഡെയെ(21 പന്തിൽ 29) മടക്കി. പിന്നാലെ വാർണറും(29 പന്തിൽ 28) പുറത്തായി.
തൊട്ടടുത്ത പന്തില് പ്രിയം ഗാര്ഗുമായുള്ള ആശയക്കുഴപ്പത്തെ തുടര്ന്ന് കെയ്ന് വില്യംസൺ (13 പന്തിൽ 9) റണ്ണൗട്ടായി. തുടർന്നു പ്രിയം ഗാര്ഗും-അഭിഷേക് ശര്മയും ചേർന്നു ഹൈദരാബാദിനെ മുന്നോട്ടു നയിക്കുകയായിരുന്നു. 24 പന്തുകള് നേരിട്ട അഭിഷേക് ശര്മ ഒരു സിക്സും നാലു ഫോറുമടക്കം 31 റണ്സെടുത്തു.
ദീപക് ചാഹർ രണ്ടും സാം കറൻ, ഷർദുൽ താക്കൂർ, പീയുഷ് ചൗള എന്നിവർ ഓരോ വിക്കറ്റും നേടി.
പ്രിയം ഗാർഗ് മിന്നി; ചെന്നൈ സൂപ്പര് കിംഗ്സിന് 165 റണ്സ് വിജയലക്ഷ്യം
09:42 PM Oct 02, 2020 | Deepika.com