കൊച്ചി: താരങ്ങൾ പ്രതിഫലം കുറയ്ക്കാത്തതിനെ തുടർന്ന് രണ്ടു ചിത്രങ്ങൾക്ക് പ്രൊഡ്യൂസേഴ്സ് അസോസിയേഷൻ അനുമതി നിഷേധിച്ചു. ടൊവിനോ തോമസ്, ജോജു ജോർജ് എന്നിവർ കേന്ദ്ര കഥാപാത്രങ്ങളാകുന്ന ചിത്രങ്ങൾക്കാണ് അംഗീകാരം നൽകാതിരുന്നത്.
ഇരുവരും കൂടുതൽ പ്രതിഫലം ആവശ്യപ്പെട്ട സാഹചര്യത്തിലാണ് നിർമാതാക്കളുടെ സംഘടന നടപടിയെടുത്തത്. പുതിയ പ്രൊജക്ടുകളിൽ താരങ്ങളുടെ പ്രതിഫലം പരിശോധിക്കാൻ പ്രൊഡ്യൂസേഴ്സ് അസോസിയേഷൻ പ്രത്യേക സമിതിയെയും നിയോഗിച്ചിട്ടുണ്ട്.
അതേസമയം ആന്റണി പെരുമ്പാവൂർ നിർമിച്ച് ജീത്തു ജോസഫ് സംവിധാനം ചെയ്യുന്ന മോഹൻലാൽ ചിത്രം ദൃശ്യം 2- വിന് അനുമതി നൽകിയിട്ടുണ്ട്. ചിത്രത്തിൽ മോഹൻലാൽ പകുതി ശമ്പളം മാത്രമാണ് വാങ്ങുന്നതെന്ന് പ്രൊഡ്യൂസേഴ്സ് അസോസിയേഷൻ അറിയിച്ചു.
കോവിഡിന്റെ പശ്ചാത്തലത്തിൽ നിശ്ചലമായ സിനിമ മേഖലയെ മുന്നോട്ട് എത്തിക്കാൻ താരങ്ങൾ പ്രതിഫലം കുറയ്ക്കാൻ തയാറാകണമെന്ന് നിർമാതാക്കളുടെ സംഘടന നേരത്തെ ആവശ്യപ്പെട്ടിരുന്നു.
ദൃശ്യം രണ്ടിൽ മോഹൻലാലിന് പകുതി പ്രതിഫലം; രണ്ടു ചിത്രങ്ങൾക്ക് അനുമതിയില്ല
02:39 PM Sep 29, 2020 | Deepika.com