ന്യൂഡൽഹി: കേരള കോണ്ഗ്രസ്-എമ്മിന്റെ മുന്നണി പ്രവേശനം സംബന്ധിച്ച തീരുമാനം വൈകാതെ എടുക്കുമെന്ന് ജോസ് കെ. മാണി എംപി. കേന്ദ്രസർക്കാരിന്റെ കർഷക വിരുദ്ധ ബില്ലുകൾക്കും അവശ്യസാധന ഭേദഗതിക്കുമെതിരേ പോരാട്ടം ശക്തമാക്കുമെന്നും അദ്ദേഹം പറഞ്ഞു.
ത്രിതല പഞ്ചായത്തു തെരഞ്ഞെടുപ്പിനു മുന്പായി മുന്നണി പ്രവേശനം അടക്കമുള്ള രാഷ്ട്രീയതീരുമാനം സ്വീകരിക്കാൻ കേരള കോണ്ഗ്രസ്-എം സ്റ്റീയറിംഗ് കമ്മിറ്റി തീരുമാനമെടുത്തിട്ടുണ്ട്. പാർലമെന്റ് സമ്മേളനം ആയിരുന്നതിനാൽ ഇതു സംബന്ധിച്ചു പാർട്ടി പ്രവർത്തകരും നേതാക്കളുമായി കൂടുതൽ ചർച്ചകൾ നടത്താനായില്ല.
ഏതെങ്കിലും മുന്നണികളുടെ നേതാക്കളുമായും ചർച്ച നടത്തിയിട്ടില്ല. കെ.എം. മാണി പടുത്തുയർത്തിയ ജനകീയ അടിത്തറയുള്ള പാർട്ടിയെ കൂടുതൽ ശക്തിപ്പെടുന്നതാകും തീരുമാനം. കേരളത്തിലെത്തിയ ശേഷം പാർട്ടിയിലെ സഹപ്രവർത്തകരുമായി കൂടിയാലോചിച്ചാകും തീരുമാനമെടുക്കുക- ജോസ് പറഞ്ഞു.
മുന്നണി പ്രവേശനം: കേരള കോണ്ഗ്രസ്-എം തീരുമാനം വൈകില്ലെന്ന് ജോസ് കെ. മാണി
10:55 PM Sep 23, 2020 | Deepika.com