കൊച്ചി: എറണാകുളത്ത് ചികിത്സയിലുള്ള നാല് കോവിഡ് രോഗികൾ ഗുരുതരാവസ്ഥയിൽ. നാലു പേരും എറണാകുളം മെഡിക്കൽ കോളജ് ആശുപത്രിയിലാണ് ചികിത്സയിലുള്ളത്. വെന്റിലേറ്ററിന്റെ സഹായത്താലാണ് ജീവൻ നിലനിർത്തുന്നത്.
കോലഞ്ചേരി മെഡിക്കൽ കോളേജ് ആശുപത്രിയിൽ നിന്നും ഈമാസം 16 ന് എത്തിയ 64 വയസുള്ള ആലുവ സ്വാദേശിനിയാണ് ഗുരുതരാവസ്ഥയിലുള്ള ഒരു രോഗി. കോവിഡ് സ്ഥിരീകരിച്ച ഇവർക്ക് ന്യൂമോണിയ പിടിപെട്ട് ഗുരുതരാവസ്ഥയിലാണ്.
എറണാകുളം പാനായിക്കുളം സ്വദേശിയും (55) ഗുരുതരാവസ്ഥയിലാണ്. ദീർഘനാളായി രക്ത സമ്മർദ്ദത്തിന് ചികിത്സയിലായിരുന്ന ഇദ്ദേഹത്തിന് ന്യൂമോണിയ ബാധിച്ചതാണ് ഗുരുതരാവസ്ഥയിലെത്തിച്ചത്.
ആലുവ കുന്നുകര സ്വദേശിനി (53) ന്യൂമോണിയ ബാധിച്ചു ഗുരുതരാവസ്ഥയിലാണ്. ഈമാസം 13 നു കോവിഡ് സ്ഥിരീകരിച്ചതിനെ തുടർന്ന് കാർമൽ ഹോസ്പിറ്റലിൽ നിന്നും മെഡിക്കൽ കോളേജിലേക്ക് മാറ്റുകയായിരുന്നു.
ഇലഞ്ഞി സ്വദേശി (42) മംഗളൂരുവിൽവച്ച് വീഴ്ചയിൽ ഉണ്ടായ അപകടത്തിനെ തുടർന്ന് നട്ടെല്ലിന് പരുക്ക് പറ്റി ഈമാസം 11 നു ഫാദർ മുള്ളേഴ്സ് മെഡിക്കൽ കോളജിലും തുടർന്ന് കോട്ടയം മെഡിക്കൽ കോളജിലും ചികിത്സയിൽ ആയിരുന്നു. കിടപ്പ് രോഗിയായ ഇദ്ദേഹത്തിന്റെ കോവിഡ് പരിശോധന ഫലം പോസിറ്റീവ് ആയതിനെ തുടർന്ന് 23 ന് എറണാകുളം മെഡിക്കൽ കോളജിൽ പ്രവേശിപ്പിച്ചു. നില ഗുരുതരമാണ്.
എറണാകുളത്ത് ചികിത്സയിലുള്ള നാല് കോവിഡ് രോഗികൾ ഗുരുതരാവസ്ഥയിൽ
07:12 PM Jul 26, 2020 | Deepika.com