തിരുവനന്തപുരം: കണ്ണൂർ ജില്ലയിലെ കെഎസ്ആര്ടിസി ഡ്രൈവർക്ക് കോവിഡ് ബാധിച്ചതിന്റെ പശ്ചാത്തലത്തിൽ കെഎസ്ആര്ടിസി ബസുകളിൽ കൂടുതൽ സുരക്ഷാസംവിധാനങ്ങൾ ഏർപ്പെടുത്താൻ ഗതാഗതവകുപ്പ് മന്ത്രി എ.കെ. ശശീന്ദ്രൻ നിർദ്ദേശം നൽകി.
കെഎസ്ആര്ടിസി ബസ്സുകളിൽ ഡ്രൈവറുടെ കാബിൻ പ്രത്യേക സംവിധാനം ഉപയോഗിച്ചു വേർതിരിക്കും. യാത്രക്കാരിൽനിന്നു സുരക്ഷാ അകലം പാലിക്കുന്നതിനും, മാസ്ക്, ഗ്ലൗസ്, സാനിറ്റൈസർ എന്നിവ കർശനമായി ഉപയോഗിക്കാനും ഡ്രൈവർമാർക്കും, കണ്ടക്ടർമാർക്കും നിർദ്ദേശം നൽകി. ഇതിനാവശ്യമായ സജീകരണങ്ങൾ ബസുകളിൽ ലഭ്യമാക്കും.
ആദ്യഘട്ടത്തിൽ കണ്ണൂർ, കരിപ്പുർ, നെടുന്പാശേരി, തിരുവനന്തപുരം വിമാനത്താവളങ്ങൾ കേന്ദ്രീകരിച്ചും റെയിൽവേ സ്റ്റേഷനുകൾ കേന്ദ്രീകരിച്ചും സർവീസ് നടത്തുന്ന ബസുകളിലായിരിക്കും ഈ സംവിധാനങ്ങൾ ഏർപ്പെടുത്തുക. ആവശ്യമെന്നുകണ്ടാൽ മറ്റുസ്ഥലങ്ങളിലേക്കും ഇത് വ്യാപിപ്പിക്കും.
കോവിഡിന്റെ സാഹചര്യത്തിൽ ജോലിചെയ്യുന്ന കെഎസ്ആര്ടിസി ജീവനക്കാരുടെ സുരക്ഷ ഉറപ്പുവരുത്തുന്നതിൽ സർക്കാർ പ്രതിജ്ഞാബദ്ധമാമെന്നും അവരുടെ മനോവീര്യം ഉയർത്തുന്നതിന് എല്ലാ നടപടികളും സ്വീകരിക്കുമെന്നും മന്ത്രി പറഞ്ഞു.
കെഎസ്ആര്ടിസി ഡ്രൈവർക്ക് കോവിഡ്; സുരക്ഷ ശക്തമാക്കുമെന്ന് ഗതാഗതമന്ത്രി
07:10 PM Jun 14, 2020 | Deepika.com