തിരുവനന്തപുരം: കോവിഡ് വ്യാപനവുമായി ബന്ധപ്പെട്ട് നിലവിലെ സാഹചര്യം ചർച്ച ചെയ്യാൻ സർവകക്ഷിയോഗം വിളിക്കണമെന്ന് പ്രതിപക്ഷ നേതാവ് രമേശ് ചെന്നിത്തല. കോവിഡുമായി ബന്ധപ്പെട്ട് ഒന്നും പ്രതിപക്ഷ കക്ഷികളുമായി ആലോചിക്കുന്നില്ല. നിലവിലുള്ള സാഹചര്യം ചർച്ച ചെയ്യാൻ സർക്കാർ തയാറാകണമെന്നും രമേശ് ചെന്നിത്തല ആവശ്യപ്പെട്ടു.
മുഖ്യമന്ത്രി പിണറായി വിജയന്റെ പിടിവാശിയും ദുർവാശിയുമാണ് എസ്എസ്എൽസി, ഹയർസെക്കൻഡറി പരീക്ഷകൾ നിശ്ചയിച്ച തീയതികളിൽ നടത്താനുള്ള തീരുമാനത്തിനു പിന്നിൽ. ആയിരക്കണക്കിന് വിദ്യാർഥികളെ കുരുതികൊടുക്കുകയാണ് ഇതിലൂടെയെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ ആരോപിച്ചു.
സാമൂഹിക അകലം പാലിച്ച് ഇത്രയും അധികം കുട്ടികൾ എങ്ങനെ സ്കൂളുകളിലെത്തും. ആരോഗ്യവിദഗ്ധരുമായി ആലോചിച്ചാണോ തീരുമാനമെടുത്തതെന്നും മുല്ലപ്പള്ളി ചോദിച്ചു. പരീക്ഷ മാറ്റിവയ്ക്കാൻ സർക്കാർ തയാറാകണമെന്നും അദ്ദേഹം ആവശ്യപ്പെട്ടു. ദുരിതകാലത്ത് സർക്കാർ ജനങ്ങളെ കൊള്ളയടിക്കുകയാണ്. ബസ് ചാർജ് വർധന പിൻവലിക്കണമെന്നും മുല്ലപ്പള്ളി സർക്കാരിനോട് ആവശ്യപ്പെട്ടു.
കോവിഡ്: സർവകക്ഷിയോഗം വിളിക്കണമെന്ന് കോൺഗ്രസ്
03:43 PM May 19, 2020 | Deepika.com