ന്യൂഡൽഹി: ഉത്തർപ്രദേശ് അതിർത്തിയിൽ കുടിയേറ്റ തൊഴിലാളികളെ എത്താൻ സഹായിച്ച ഡൽഹി കോണ്ഗ്രസ് അധ്യക്ഷൻ അനിൽ ചൗധരി കസ്റ്റഡിയിൽ. ഡൽഹി-ഉത്തർപ്രദേശ് അതിർത്തിയിൽ സാമൂഹ്യ അകലം പാലിക്കാതെ തൊഴിലാളികളെ എത്തിച്ചതിനെ തുടർന്ന് കരുതൽ തടങ്കലിൽ വയ്ക്കുന്നു എന്നാണ് പോലീസിന്റെ ഒൗദ്യോഗിക വിശദീകരണം.
ദുരന്ത നിവാരണ നിയമ പ്രകാരവും ഐപിസി 188 പ്രകാരവും അനിൽ ചൗധരിക്കെതിരേ ഡൽഹി പോലീസ് കേസ് രജിസ്റ്റർ ചെയ്തിട്ടുണ്ട്. കോണ്ഗ്രസിന്റെ നേതൃത്വത്തിൽ ഡൽഹിയിൽനിന്ന് ഉത്തർപ്രദേശ് അതിർത്തിയായ ഗാസിപ്പൂരിലേക്ക് വാഹനങ്ങളിൽ തൊഴിലാളികളെ എത്തിച്ചിരുന്നു. 300 തൊഴിലാളികളെ ഇത്തരത്തിൽ എത്തിച്ചെന്നാണു കണക്ക്.
ഇതിനു പിന്നാലെ അനിൽ ചൗധരിയുടെ വീട്ടിലെത്തിയ ഡൽഹി പോലീസ് അദ്ദേഹത്തെ അറസ്റ്റ് ചെയ്യുകയായിരുന്നു. കോണ്ഗ്രസ് നേതാവ് രാഹുൽ ഗാന്ധി കഴിഞ്ഞ ദിവസം ഡൽഹിയിൽ നാട്ടിലേക്കു മടങ്ങുന്ന കുടിയേറ്റ തൊഴിലാളികളുമായി ആശയവിനിമയം നടത്തിയിരുന്നു.
കുടിയേറ്റ തൊഴിലാളികളെ സഹായിച്ചു; ഡൽഹി കോണ്ഗ്രസ് അധ്യക്ഷൻ കസ്റ്റഡിയിൽ
01:09 AM May 18, 2020 | Deepika.com