ന്യൂഡൽഹി: ലോക്ക്ഡൗൺ നിയന്ത്രണങ്ങളിൽ കൂടുതൽ ഇളവുകൾ ആവശ്യപ്പെട്ട് ഡൽഹി സർക്കാർ. നാലാംഘട്ട ലോക്ക്ഡൗണിൽ മാർക്കറ്റുകളും ഷോപ്പിംഗ് മാളുകളും ബസ്, മെട്രോ സർവീസുകളും അനുവദിക്കണമെന്ന് ഡൽഹി സർക്കാർ കേന്ദ്രത്തോട് ആവശ്യപ്പെട്ടു. സാമൂഹിക അകലം പാലിച്ചുകൊണ്ട് ഇവ പ്രവർത്തിപ്പിക്കാനുള്ള അനുമതി ഉണ്ടാകണമെന്നാണ് കേജരിവാൾ സർക്കാർ ആവശ്യപ്പെടുന്നത്.
രാജ്യതലസ്ഥാനത്ത് നിർമാണ പ്രവർത്തികൾ ആരംഭിക്കാനുള്ള അനുമതി ഉണ്ടാവണം. തൊഴിലാളികൾക്ക് സഞ്ചരിക്കാൻ കഴിയുന്ന സാഹചര്യവും ഉണ്ടാക്കണം. ടാക്സികളിൽ രണ്ട് യാത്രക്കാർ എന്ന നിലയിലും ബസുകളിൽ 20 യാത്രക്കാർ എന്ന നിലയിലും സർവീസ് നടത്താൻ അനുവദിക്കണം.
മാർക്കറ്റുകൾ, കോംപ്ലക്സുകൾ, മാളുകൾ എന്നിവ തുറക്കാൻ അനുവദിക്കണം. എന്നിരുന്നാലും, ഷോപ്പിംഗ് കോംപ്ലക്സുകളിലും മാളുകളിലും അവശ്യ വസ്തുക്കൾ അല്ലാതെ കച്ചവടം നടത്തുന്ന കടകളെ ഒറ്റ ഇരട്ട അക്ക സമ്പ്രദായ അടിസ്ഥാനത്തിൽ പ്രവർത്തിക്കാൻ അനുവദിക്കണമെന്നും സംസ്ഥാനം നിർദേശിച്ചു.
ഷോപ്പിംഗ് മാളുകൾ തുറക്കാൻ അനുവദിക്കണം; കേന്ദ്രത്തോട് ആവശ്യപ്പെട്ട് ഡൽഹി സർക്കാർ
07:15 AM May 15, 2020 | Deepika.com