തിരുവനന്തപുരം: സർക്കാരിന് അന്തസുണ്ടെങ്കിൽ അമേരിക്കൻ കമ്പനിയായ സ്പ്രിങ്ക്ളറുമായുള്ള കരാർ റദ്ദാക്കണമെന്ന് പ്രതിപക്ഷ നേതാവ് രമേശ് ചെന്നിത്തല. ഹൈക്കോടതി ഇടക്കാല ഉത്തരവിനെ പ്രതിപക്ഷം സ്വാഗതം ചെയ്യുകയാണ്. ഇടക്കാല ഉത്തരവിന്റെ പശ്ചാത്തലത്തിൽ സ്പ്രിങ്ക്ളർ കരാർ റദ്ദാക്കാൻ സർക്കാർ തയാറാകണമെന്നും ചെന്നിത്തല ആവശ്യപ്പെട്ടു.
ഇടക്കാല ഉത്തരവിലൂടെ പ്രതിപക്ഷം ഉന്നയിച്ച 99 ശതമാനം കാര്യങ്ങൾക്കും പരിഹാരമായി. പ്രതിപക്ഷം ഉന്നയിച്ച ആരോപണങ്ങൾ ഗൗരവമുള്ളതാണെന്ന് തെളിഞ്ഞു. ഡേറ്റ സുരക്ഷ, വ്യക്തിയുടെ അനുമതി എന്നീ ആശങ്കകൾ കോടതി അംഗീകരിച്ചിരിക്കുകയാണെന്നും ചെന്നിത്തല കൂട്ടിച്ചേർത്തു.
കോടതിയുടെ പരാമർശങ്ങളിൽ അസന്തുഷ്ടി നിലനിൽക്കുന്നെന്ന് വ്യക്തമാണ്. കോവിഡിന്റെ മറവിൽ ഡേറ്റ അഴിമതി നടത്താനുള്ള ശ്രമം നടപ്പാവില്ലെന്നും ചെന്നിത്തല പറഞ്ഞു.
അന്തസുണ്ടെങ്കിൽ സ്പ്രിങ്ക്ളർ കരാർ റദ്ദാക്കണം: ചെന്നിത്തല
04:48 PM Apr 24, 2020 | Deepika.com