ബംഗളൂരു: കർണാടകയിലെ ബംഗളൂരുവിൽ ആരോഗ്യപ്രവർത്തകരെ ആക്രമിച്ച രണ്ട് പേർക്ക് കോവിഡ് 19 സ്ഥിരീകരിച്ചു. ബംഗളൂരുവിലെ പടാരായണപുരിൽവച്ച് ഏപ്രിൽ 19നാണ് ആരോഗ്യപ്രവർത്തകർക്കു നേരെ ആക്രമണം ഉണ്ടായത്. വീടുകൾ കേന്ദ്രീകരിച്ച് പരിശോധനയ്ക്ക് എത്തിയ ആരോഗ്യപ്രവർത്തകരാണ് അക്രമണത്തിന് ഇരയായത്.
ബംഗളൂരിൽ ആരോഗ്യപ്രവർത്തകരുമായി സഹകരിക്കാത്ത 54 പേരെ പോലീസ് അറസ്റ്റു ചെയ്തിരുന്നു. കഴിഞ്ഞ ദിവസം ഉത്തർപ്രദേശിലെ മൊറാദാബാദിലും ആരോഗ്യപ്രവർത്തകരെ ആക്രമിച്ചവർക്ക് കോവിഡ് സ്ഥിരീകരിച്ചിരുന്നു. അഞ്ച് പേർക്കാണ് കോവിഡ് സ്ഥിരീകരിച്ചത്.
ആരോഗ്യപ്രവർത്തകർക്ക് നേരെ ഇവർ കല്ലെറിയുകയായിരുന്നു. ഡോക്ടർ ഉൾപ്പെടെ മൂന്നു പേർക്ക് സംഭവത്തിൽ പരിക്കേറ്റു. കൂടാതെ ഇവർ വന്ന ആംബുലൻസും അക്രമികൾ കല്ലെറിഞ്ഞ് തകർത്തിട്ടുണ്ട്.
ആരോഗ്യപ്രവർത്തകർക്കുനേരെ ആക്രമണം വർധിച്ചതോടെ കേന്ദ്രസർക്കാർ ഇവരുടെ സംരക്ഷണത്തിനായി പുതിയ ഓർഡിനൻസ് കൊണ്ടുവന്നിരുന്നു.
ബംഗളൂരുവിൽ ആരോഗ്യപ്രവർത്തകരെ ആക്രമിച്ച രണ്ട് പേർക്ക് കോവിഡ്
09:42 AM Apr 24, 2020 | Deepika.com