വാഷിംഗ്ടണ് ഡിസി: കോവിഡ് വ്യാപനത്തിന്റെ രണ്ടാം വരവ് സംബന്ധിച്ച് താൻ പറഞ്ഞത് തെറ്റിധരിക്കപ്പെട്ടുവെന്ന് അമേരിക്കൻ സെന്റർ ഫോർ ഡിസീസ് കണ്ട്രോൾ ആൻഡ് പ്രിവെൻഷൻ ഡയറക്ടർ റോബർട്ട് റെഡ്ഫീൽഡ്. അമേരിക്കൻ പ്രസിഡന്റ് ഡോണൾഡ് ട്രംപ് നടത്തിയ പ്രതിദിന വാർത്താ സമ്മേളനത്തിനിടെയാണ് റോബർട്ട് റെഡ്ഫീൽഡ് ഇത് സംംബന്ധിച്ച് വ്യക്തത വരുത്തിയത്.
രാജ്യത്തെ ഇപ്പോഴത്തെ അവസ്ഥ കൂടുതൽ ദുഷ്കരമാകുമെന്നല്ല താൻ പറഞ്ഞതെന്ന് അദ്ദേഹം ചൂണ്ടിക്കാട്ടി. ശൈത്യകാലത്ത് പനിയും അതിനൊപ്പം കോവിഡും കൂടി വന്നാൽ അങ്ങനെയുള്ള അവസ്ഥ പ്രതിസന്ധി സൃഷ്ടിക്കുമെന്നാണ് താൻ സൂചിപ്പിച്ചതെന്നും റോബർട്ട് റെഡ്ഫീൽഡ് പറഞ്ഞു.
രണ്ടു വൈറസുകൾ ഒേരേസമയം വന്നാൽ അത് എത്രത്തോളം ദുഷ്കരമാകുമെന്ന് പറയാനാണ് ശ്രമിച്ചതെന്നും അദ്ദേഹം ന്യായീകരിച്ചു. ആളുകൾ നിയന്ത്രണങ്ങൾ കർശനമായി പാലിക്കേണ്ടതിന്റെ ആവശ്യകത ചൂണ്ടിക്കാട്ടിയാണ് താൻ ഇക്കാര്യം പറഞ്ഞതെന്നും അദ്ദേഹം കൂട്ടിച്ചേർത്തു.
സിഡിസി ഡയറകടറുടെ വാക്കുകളെ തെറ്റിധരിക്കുകയാണ് ഉണ്ടായതെന്നും അദ്ദേഹം പറഞ്ഞ കാര്യങ്ങൾ വ്യക്തമാണെന്നും ട്രംപും കൂട്ടിച്ചേർത്തു.
കോവിഡിന്റെ രണ്ടാം വരവ്; താൻ പറഞ്ഞത് തെറ്റിധരിക്കപ്പെട്ടുവെന്ന് സിഡിസി ഡയറക്ടർ
07:10 AM Apr 23, 2020 | Deepika.com