ദിസ്പുർ: ആസാമിൽ ആദ്യത്തെ കോവിഡ്-19 മരണം റിപ്പോർട്ട് ചെയ്തു. ഡല്ഹി നിസാമുദ്ദീനിലെ തബ്ലീഗ് ജമാഅത്തിന്റെ പരിപാടിയില് പങ്കെടുത്തു തിരിച്ചെത്തിയ 65 വയസുകാരനാണ് മരിച്ചത്. ഹയ്ലകന്തി സ്വദേശിയായ ഇയാൾ സിൽച്ചാരിലെ മെഡിക്കൽ കോളജിൽ ചികിത്സയിലായിരുന്നു.
നിസാമുദ്ദീൻ സമ്മേളനത്തിൽ പങ്കെടുത്ത 27 പേർക്കാണ് ആസാമിൽ കോവിഡ് സ്ഥിരീകരിച്ചത്. ഇതിലൊരാളായ 65 വയസുകാരൻ ഗുരുതരാവസ്ഥയിൽ ആശുപത്രിയിൽ ചികിത്സയിലായിരുന്നു. അടുത്തിടെ സൗദി അറേബ്യയും ഇയാൾ സന്ദർശിച്ചിരുന്നതായി ആസാം ആരോഗ്യമന്ത്രി ഹിമന്ത ബിസ്വ സർമ അറിയിച്ചു.
വടക്കു-കിഴക്കൻ സംസ്ഥാനങ്ങളിലെ ആദ്യ കോവിഡ് മരണമാണിത്. സംസ്ഥാനത്ത് ഇതുവരെ 29 കോവിഡ് കേസുകളാണ് റിപ്പോർട്ട് ചെയ്തത്.
കോവിഡ്: നിസാമുദ്ദീൻ സമ്മേളനത്തിൽ പങ്കെടുത്തയാൾ ആസാമിൽ മരിച്ചു
11:54 AM Apr 10, 2020 | Deepika.com