കാബൂൾ: അഫ്ഗാനിസ്ഥാനിലെ കാബൂളിൽ സിഖ് ഗുരുദ്വാരയിൽ ഭീകരാക്രമണത്തിന്റെ മുഖ്യസൂത്രധാരൻ അറസ്റ്റിൽ. പാക് പൗരനായ മൗലവി അബ്ദുള്ള എന്നറിയപ്പെടുന്ന അസ്ലം ഫാറൂഖിയാണ് അറസ്റ്റിലായത്. ഫാറൂഖിയേയും ഇയാളുടെ അനുയായിയേയും അഫ്ഗാൻ സുരക്ഷാ സേനയാണ് അറസ്റ്റ് ചെയ്തത്. ലക്ഷ്കർ ഇ തോയ്ബയും ഹഖായി നെറ്റ്വർക്കുമായും ബന്ധമുള്ളയാളാണ് ഫാറൂഖി.
കാബൂളിൽ നടന്ന ചാവേർ ആക്രമണത്തിൽ 27 പേരാണ് കൊല്ലപ്പെട്ടത്. ഇസ്ലാമിക് സ്റ്റേറ്റ് (ഐഎസ്) നടത്തിയ ആക്രമണവുമായി ബന്ധപ്പെട്ട് മലയാളിയേയും പ്രതിചേർത്ത് ദേശീയ അന്വേഷണ ഏജൻസി (എൻഐഎ) കേസെടുത്തിരുന്നു. ആക്രമണത്തിനു നേതൃത്വം നൽകിയ കാസർഗോഡ് തൃക്കരിപ്പൂർ സ്വദേശി മുഹമ്മദ് മുഹ്സിനെ പ്രതിചേർത്താണു കേസ് റജിസ്റ്റർ ചെയ്തത്.
വിദേശരാജ്യത്തു നടന്ന ആക്രമണവുമായി ബന്ധപ്പെട്ട് എൻഐഎ അന്വേഷിക്കുന്ന ആദ്യ കേസാണ് ഇത്. ആക്രമണത്തിൽ കൊല്ലപ്പെട്ട 27 പേരിൽ ഒരു ഇന്ത്യക്കാരനുമുണ്ടെന്ന് എൻഐഎ സ്ഥിരീകരിച്ചു. ഇദ്ദേഹം ഡൽഹി സ്വദേശിയാണ്. പരിക്കേറ്റവരിൽ എട്ട് പേർ ഇന്ത്യക്കാരാണ്.
കാബൂൾ സിഖ് ഗുരുദ്വാര ഭീകരാക്രമണം: മുഖ്യസൂത്രധാരൻ അറസ്റ്റിൽ
11:00 PM Apr 04, 2020 | Deepika.com