തിരുവനന്തപുരം: സംസ്ഥാനത്ത് ബുധനാഴ്ച 24 പേർക്കു കൂടി കൊറോണ വൈറസ് (കോവിഡ്-19) ബാധ സ്ഥിരീകരിച്ചു. കാസർഗോഡ് 12, എറണാകുളം മൂന്ന്, തിരുവനന്തപുരം, തൃശൂർ, മലപ്പുറം എന്നീ ജില്ലകളിൽ രണ്ടു പേർക്കു വീതവും പാലക്കാട് ഒരാൾക്കുമാണ് കോവിഡ് സ്ഥിരീകരിച്ചത്. ഇതോടെ സംസ്ഥാനത്ത് കോവിഡ് ബാധിച്ചവരുടെ എണ്ണം 265 ആയി ഉയർന്നു.
കോവിഡ് ബാധിച്ച് സംസ്ഥാനത്ത് 237 പേരാണ് നിലവിൽ ചികിത്സയിലുള്ളത്. ഇതിൽ ഒമ്പത് പേർ വിദേശികളാണ്. 1,46,130 പേരാണ് സംസ്ഥാനത്ത് നിരീക്ഷണത്തിൽ കഴിയുന്നത്. ഇതിൽ 622 പേർ ആശുപത്രികളിലാണ് നിരീക്ഷണത്തിലുള്ളത്.
ഇന്ന് 123 പേരെ കോവിഡ് ലക്ഷണങ്ങളോടെ ആശുപത്രിയിൽ പ്രവേശിപ്പിച്ചു. കോവിഡ് സ്ഥിരീകരിച്ചവരിൽ 191 പേർ വിദേശത്തുനിന്നും എത്തിയ മലയാളികളാണ്. ഏഴു പേർ വിദേശികളും. സമ്പർക്കം മൂലം 67 പേർക്കും രോഗം പിടിപെട്ടു.
ഇതുവരെ 26 പേരുടെ പരിശോധനാ ഫലം നെഗറ്റീവായി. ഇതിൽ നാല് വിദേശികളുമുണ്ട്. ഇന്ന് രണ്ട് പേർക്ക് രോഗം ഭേദമായി. തിരുവനന്തപുരം, കോഴിക്കോട് ജില്ലകളിലുള്ളവരാണ് പരിശോധനയിൽ നെഗറ്റീവായത്. മുഖ്യമന്ത്രി പിണറായി വിജയൻ പ്രതിദിന വാർത്താ സമ്മേളനത്തിലാണ് ഇക്കാര്യം വ്യക്തമാക്കിയത്.
സംസ്ഥാനത്ത് 24 പേർക്കു കൂടി കോവിഡ്; കാസർഗോഡ് മുന്നിൽ
07:05 PM Apr 01, 2020 | Deepika.com