കണ്ണൂർ: ഭരണ-പ്രതിപക്ഷ അംഗങ്ങൾ തമ്മിലുണ്ടായ വാക്കേറ്റത്തിനൊടുവിൽ കണ്ണൂർ കോർപ്പറേഷനിൽ കൈയാങ്കളി. ഇടത് അംഗങ്ങൾ കൈയേറ്റം ചെയ്യുകയും മർദ്ദിക്കുകയും ചെയ്തുവെന്ന് ആരോപിച്ച് മേയർ സുമ ബാലകൃഷ്ണൻ ആശുപത്രിയിൽ ചികിത്സ തേടി. ചില പ്രതിപക്ഷ അംഗങ്ങൾ തന്നെ ചവിട്ടിയെന്നും പോലീസിനോട് പരാതിപ്പെട്ടിട്ട് അവർ നോക്കിനിൽക്കുക മാത്രമാണ് ചെയ്തതതെന്നും മേയർ ആരോപിക്കുന്നു.
കോർപ്പറേഷന് മുന്നിൽ ജീവനക്കാർ നടത്തുന്ന സമരത്തിന് പരിഹാരം കാണണമെന്ന് ആവശ്യപ്പെട്ടാണ് ഇടത് അംഗങ്ങൾ മേയർക്കെതിരേ പ്രതിഷേധവുമായി രംഗത്തുവന്നത്. കോണ്ഗ്രസ് അംഗങ്ങൾ മേയറെ പ്രതിരോധിച്ച് എത്തിയതോടെ ഉന്തും തള്ളുമായി. ഇതിനിടെയാണ് ചില അംഗങ്ങൾ കൈയേറ്റം ചെയ്തതെന്ന് മേയർ ആരോപിച്ചു.
അതേസമയം ഭരണപക്ഷ അംഗങ്ങൾ കൈയേറ്റം ചെയ്തെന്ന് ആരോപിച്ച് പ്രതിപക്ഷ അംഗങ്ങളും ആശുപത്രിയിൽ ചികിത്സ തേടിയിട്ടുണ്ട്. മേയറെ കൈയേറ്റം ചെയ്തതിൽ പ്രതിഷേധിച്ച് കണ്ണൂർ കോർപ്പറേഷൻ പരിധിയിൽ വ്യാഴാഴ്ച ഉച്ചവരെ യുഡിഎഫ് ഹർത്താലിന് ആഹ്വാനം ചെയ്തിട്ടുണ്ട്.
കണ്ണൂർ കോർപ്പറേഷനിൽ കൈയാങ്കളി; മേയർ ആശുപത്രിയിൽ
03:32 PM Feb 19, 2020 | Deepika.com