ന്യൂഡൽഹി: മൂന്നാം തവണ ഡൽഹി മുഖ്യമന്ത്രിയായി സത്യപ്രതിജ്ഞ ചെയ്യുന്ന ചടങ്ങിലേക്കു പ്രധാനമന്ത്രി നരേന്ദ്ര മോദിയെ ക്ഷണിച്ചു ഡൽഹി മുഖ്യമന്ത്രി അരവിന്ദ് കേജരിവാൾ. മറ്റുള്ള സംസ്ഥാനങ്ങളിൽ നിന്നുള്ള രാഷ്ട്രീയക്കാർക്കോ മുഖ്യമന്ത്രിമാർക്കോ ക്ഷണമില്ല.
ചരിത്രപ്രസിദ്ധമായ രാംലീല മൈതാനത്തു ഞായറാഴച രാവിലെ പത്തിനാണു മൂന്നാം കേജരിവാൾ സർക്കാരിന്റെ സത്യപ്രതിജ്ഞാ ചടങ്ങ് നടക്കുന്നത്. ഡൽഹിയിലുള്ളവരെ മാത്രമാണു സത്യപ്രതിജ്ഞാ ചടങ്ങിന് ക്ഷണിക്കുകയെന്ന് ആം ആദ്മി പാർട്ടി വൃത്തങ്ങൾ കഴിഞ്ഞ ദിവസം പറഞ്ഞിരുന്നു. പൊതുജനങ്ങൾക്കും ചടങ്ങിൽ പങ്കെടുക്കാം.
പ്രധാനമന്ത്രി ഞായറാഴ്ച വാരാണസി സന്ദർശിക്കുന്നതിനാൽ ചടങ്ങിനെത്തുമോയെന്നു വ്യക്തമല്ല. കേജരിവാളിനെ അനുകരിച്ച് മഫ്ളറും കണ്ണടയും ധരിച്ച ബാലനെയും കേജരിവാൾ സത്യപ്രതിജ്ഞാ ചടങ്ങിലേക്ക് ക്ഷണിച്ചിട്ടുണ്ട്.
മോദിയെ സത്യപ്രതിജ്ഞയ്ക്കു ക്ഷണിച്ച് കേജരിവാൾ; മറ്റു നേതാക്കളെ ഒഴിവാക്കി
06:13 PM Feb 14, 2020 | Deepika.com