തിരുവനന്തപുരം: ശ്രീവരാഹത്ത് യുവാവ് കുത്തേറ്റ് മരിച്ച സംഭവത്തിൽ രണ്ടു പേരെ പോലീസ് കസ്റ്റഡിയിലെടുത്തു. കേസിലെ പ്രധാന പ്രതിയെന്ന് സംശയിക്കുന്ന അർജുൻ എന്നയാളുടെ കൂട്ടാളികളായ രണ്ടു പേരാണ് പോലീസ് പിടിയിലുള്ളത്. ഇവരെ പോലീസ് വിശദമായി ചോദ്യം ചെയ്തു വരികയാണ്.
കഴിഞ്ഞ രാത്രിയാണ് സംഭവം. ശ്രീവരാഹം പുന്നപുരം സ്വദേശി മണിക്കുട്ടൻ എന്ന് വിളിയ്ക്കുന്ന ശ്യാം (28) ആണ് മരിച്ചത്. ശ്രീവരാഹത്ത് രാത്രിയിൽ രണ്ട് സംഘങ്ങൾ തമ്മിലുണ്ടായ ഏറ്റുമുട്ടൽ തടയാൻ ശ്രമിക്കവെയാണ് ശ്യാമിന് കുത്തേറ്റതെന്ന് പോലീസ് പറഞ്ഞു.
ഒളിവിൽ പോയിരിക്കുന്ന അർജുനാണ് കുപ്പി പൊട്ടിച്ച് ശ്യാമിനെ കുത്തിയതെന്ന് പോലീസ് പറഞ്ഞു. അർജുനെ കണ്ടെത്താൻ പോലീസ് ഊർജിത ശ്രമം നടത്തുന്നുണ്ട്.
മരിച്ച യുവാവിന്റെ പോസ്റ്റ്മോർട്ടം ഇന്ന് തിരുവനന്തപുരം മെഡിക്കൽ കോളജിൽ നടക്കും. കൊല്ലപ്പെട്ട യുവാവിന്റെ പേരിലും നിരവധി ക്രിമിനൽ കേസുകളുണ്ടെന്ന് പോലീസ് വ്യക്തമാക്കി.
യുവാവ് കുത്തേറ്റ് മരിച്ച സംഭവം: രണ്ടു പേർ കസ്റ്റഡിയിൽ
12:42 PM Mar 15, 2019 | Deepika.com