കോട്ടയം: ചിങ്ങവനം പാത്താമുട്ടത്ത് കരോൾ സംഘത്തെ ആക്രമിച്ച കേസിൽ ഏഴു പേരെ പോലീസ് അറസ്റ്റു ചെയ്തു. പ്രതികളിൽ പ്രായപൂർത്തിയാകാത്തയാൾക്ക് പോലീസ് സ്റ്റേഷനിൽ നിന്ന് ജാമ്യം നൽകി.
മറ്റ് ആറു പേരെ ചങ്ങനാശേരി കോടതിയിൽ ഹാജരാക്കി. മൂന്നു മാസത്തേക്ക് പനച്ചിക്കാട് വില്ലേജിൽ പ്രവേശിക്കരുതെന്ന വ്യവസ്ഥയിൽ കോടതി ഇവർക്ക് ജാമ്യം നല്കി. പാത്താമുട്ടം സ്വദേശികളായ ശ്രീക്കുട്ടൻ, അലൻ ജോസഫ്, ശ്രീജിത്ത്, നിധീഷ്, അജിത്കുമാർ, അഖിൽ എന്നിവരും ഏഴാം പ്രതി പ്രായപൂർത്തിയാകാത്തയാളുമാണ് അറസ്റ്റിലായതെന്ന് ചിങ്ങവനം പോലീസ് അറിയിച്ചു.
കുറിച്ചി പാത്താമുട്ടം പാന്പൂരംപാറയിലെ ആംഗ്ലിക്കൻ പള്ളിയിൽ നിന്നു പോയ കരോൾ സംഘത്തിനെയാണ് ആക്രമിച്ചത്. തുടർന്ന് പള്ളിക്ക് നേരേയും ആക്രമണം ഉണ്ടായി. ആക്രമ സംഘത്തിന്റെ കല്ലേറിൽ ലിൻസി, ആശ, ബോവാസ് എന്നിവർക്ക് പരിക്കേറ്റിരുന്നു.
ഞായറാഴ്ച രാത്രി പതിനൊന്നോടെ പള്ളിയിൽ നിന്നും സ്ത്രീകളടങ്ങുന്ന കരോൾ സംഘം സമീപത്തെ കോളനിയിൽ എത്തിയതോടെയാണ് സംഭവത്തിന്റെ തുടക്കം. ഇവിടെ വച്ച് ചിലരുമായി വാക്കുതർക്കം ഉണ്ടായതിനെ തുടർന്ന് പള്ളിയിലേക്ക് തിരികെ പോന്ന സംഘത്തെ പിന്തുടർന്നെത്തിയവർ ആക്രമിക്കുകയായിരുന്നു.
ആക്രമണത്തിൽ പള്ളിക്കുള്ളിലെ വസ്തുക്കൾക്കും കേടുപാടുകൾ സംഭവിച്ചു. സമീപത്തെ മൂന്ന് വീടുകൾക്ക് നേരെയും ആക്രമണമുണ്ടായി. പള്ളിക്ക് സമീപം വച്ചിരുന്ന ബൈക്കിനും അക്രമികൾ കേടുവരുത്തി.
കോട്ടയത്ത് കരോൾ സംഘത്തെ ആക്രമിച്ച സംഭവം: ഏഴ് പേർ അറസ്റ്റിൽ
04:15 PM Dec 26, 2018 | Deepika.com