പത്തനംതിട്ട: മണ്ഡലപൂജയ്ക്കു ശബരിമല ക്ഷേത്രത്തിലെ അയ്യപ്പവിഗ്രഹത്തിൽ ചാര്ത്താനുള്ള തങ്ക അങ്കി വഹിച്ചുള്ള രഥഘോഷയാത്ര ചൊവ്വാഴ്ച സന്നിധാനത്തെത്തും. ഇതിന് മുന്നോടിയായി ശബരിമലയിൽ കനത്ത ഭക്തജനത്തിരക്കാണ് അനുഭവപ്പെടുന്നത്. ചൊവ്വാഴ്ച വൈകിട്ട് ഏഴിനാണ് തങ്ക അങ്കി ചാർത്തിയുള്ള പൂജകൾ നടക്കുക.
ചൊവ്വാഴ്ച ഉച്ചയോടെയാണ് ഘോഷയാത്ര പന്പയിലെത്തുക. ഉച്ചകഴിഞ്ഞ് മൂന്നിന് പമ്പ ഗണപതി ക്ഷേത്രത്തില്നിന്നു പുറപ്പെട്ടു ശരംകുത്തിയില് എത്തും. ഇവിടെനിന്നു ദേവസ്വം ഉദ്യോഗസ്ഥര് സ്വീകരിച്ചു സന്നിധാനത്ത് എത്തിക്കും. ചൊവ്വാഴ്ച വൈകിട്ടത്തെ ചടങ്ങുകൾക്ക് ശേഷം 27ന് ഉച്ചയ്ക്കു മണ്ഡലപൂജയും നടക്കും. അന്നു രാത്രിയാണ് നട അടയ്ക്കുന്നത്.
നൂറുകണക്കിന് അയ്യപ്പഭക്തൻമാരുടെ ശരണംവിളികളുടെ അകന്പടിയിലാണ് ആറന്മുള പാർഥസാരഥി ക്ഷേത്രത്തില്നിന്നു ഘോഷയാത്ര പുറപ്പെട്ടത്. ഡിവൈഎസ്പി സുരേഷ് കുമാറിന്റെ നേതൃത്വത്തില് 70 അംഗസായുധ പോലീസ് സംഘത്തിനാണ് തങ്ക അങ്കി രഥഘോഷയാത്രയുടെ സുരക്ഷാ ചുമതല.
തങ്ക അങ്കി ഘോഷയാത്ര ചൊവ്വാഴ്ച സന്നിധാനത്ത്
12:27 PM Dec 25, 2018 | Deepika.com