ലണ്ടൻ: ഇന്ത്യയിലെയും ബ്രസീലിലെയും പൊതുതെരഞ്ഞെടുപ്പുകളിൽ റഷ്യ ഇടപെട്ടേക്കാമെന്ന് മുന്നറിയിപ്പ്. യുഎസ് സെനറ്റ് ഇന്റലിജൻസ് കമ്മിറ്റിക്കു മുന്പാകെ ഓക്സ്ഫഡ് സർവകലാശാലയിലെ സമൂഹമാധ്യമ വിദഗ്ധൻ ഫിലിപ് എൻ.ഹൊവാർഡാണ് ഈ മുന്നറിയിപ്പ് നൽകിയത്. സമൂഹമാധ്യമങ്ങളിലെ വിദേശ ഇടപെടലുകളെകുറിച്ചായിരുന്നു മൊഴിയെടുക്കൽ.
യുഎസിലെ പോലെ ഇന്ത്യ, ബ്രസീൽ എന്നിവിടങ്ങളിലെ ഉപയോക്താക്കൾക്കു സമൂഹമാധ്യമ ഇടപെടലുകളിൽ വൈദഗ്ധ്യമില്ലെന്ന് ഫിലിപ് എൻ.ഹൊവാർഡ് കമ്മിറ്റിക്കു മുന്നിൽ ചൂണ്ടിക്കാട്ടി. മാധ്യമങ്ങളിലെ ഇടപെടലുകൾക്ക് ഹംഗറി തെരഞ്ഞെടുപ്പിലെ ചില ഉദാഹരണങ്ങളും അദ്ദേഹം കമ്മിറ്റിക്കു മുന്നിൽ സമർപ്പിച്ചു. ഉടൻതന്നെ തെരഞ്ഞെടുപ്പ് നടക്കുന്ന രാജ്യങ്ങളാണ് ഇന്ത്യയും ബ്രസീലും.
2016 യുഎസ് പ്രസിഡന്റ് തെരഞ്ഞെടുപ്പിൽ റഷ്യൻ ഇടപെടലുണ്ടായോ എന്ന് അന്വേഷിക്കുന്ന സമിതിയാണ് സെനറ്റ് ഇന്റലിജൻസ് കമ്മിറ്റി. യുഎസ് പ്രസിഡന്റ് തെരഞ്ഞെടുപ്പിൽ റഷ്യൻ ഇടപെടലുണ്ടായിട്ടുണ്ടെന്ന് യുഎസ് ഇന്റലിജൻസ് ഏജൻസികൾ കഴിഞ്ഞ വർഷം ജനുവരിയിൽ അന്വേഷണത്തിൽ കണ്ടെത്തിയിരുന്നു.
ലോക്സഭാ തെരഞ്ഞെടുപ്പിൽ റഷ്യ ഇടപെടും; മുന്നറിയിപ്പുമായി ഓക്സ്ഫഡ് വിദഗ്ധൻ
09:40 PM Aug 02, 2018 | Deepika.com