കൊല്ലം: തമിഴ്നാടിനെ ഭീതിയിലാഴ്ത്തി തീരം തേടുന്ന ഗജ ചുഴലിക്കാറ്റിനെ നേരിടുന്നതിനായി തമിഴ്നാട് കടലൂർ ജില്ലാ അധികാരികളുടെ ആവശ്യപ്രകാരം കൊല്ലത്തു നിന്നും ആക്ടീവ് ഹാംസ് അമച്വർ റേഡിയോ സൊസൈറ്റിയുടെ നേതൃത്വത്തിൽ ആറു പേരടങ്ങുന്ന ഹാം ഓപ്പറേറ്റേഴ്സിന്റെ ആദ്യസംഘം തമിഴ്നാട്ടിൽ എത്തി.
കേരളാ ഫയർആൻഡ് റെസ്ക്യൂ വകുപ്പിന്റെ നേതൃത്വത്തിലാരംഭിച്ച സിആർവി സ്കീമിൽ ഉൾപ്പെട്ട് ദുരന്തങ്ങളെ നേരിടുന്നതിനടക്കമുള്ള പരിശീലനം ലഭിച്ച എഎആർഎസ് അംഗങ്ങളും കമ്മ്യൂണിറ്റി റെസ്ക്യൂ വോളണ്ടിയേഴ്സുമായ മാത്യൂ കുഞ്ഞ് കുഞ്ഞ്, ബിജു.എസ് , രാജൻ(റോയ്), അലൻ, വൈശാഖ്, താജുദീൻ എന്നിവരാണ് ഏത് പ്രതിസന്ധികളേയും അതിജീവിച്ച് തമിഴ്നാടിന് വേണ്ടി എമർജൻസി കമ്മ്യൂണിക്കേഷൻ നടത്തുന്നതിനും രക്ഷാദൗത്യത്തിനുമായി കടലൂർ ജില്ലാകളക്ട്രേറ്റിൽ പ്രവർത്തന നിരതരായിരിക്കുന്നത്.
തമിഴ്നാട്ടിൽ നടക്കുന്ന ഇവരുടെ പ്രവർത്തനങ്ങൾ ഏകോപിപ്പിക്കുന്നതിനും സഹായങ്ങൾ നൽകുന്നതിനുമായി സെക്രട്ടറി നിഷാന്തിന്റെ നേതൃത്വത്തിൽ ബിജു ഗോപിതിലക, രാജഗോപാൽ എന്നിവരടങ്ങുന്ന മറ്റൊരു ടീം കേരളത്തിലും പ്രവർത്തിക്കുന്നുണ്ട്. കേരളത്തിലുണ്ടായ മഹാ പ്രളയത്തിൽ സ്തുത്യർഹ പ്രവർത്തനം നടത്തിയവരാണ് എഎആർഎസ് ടീം അംഗങ്ങൾ.
തമിഴ്നാട്ടിലെ ചുഴലിക്കാറ്റിനെ നേരിടാൻ കൊല്ലത്തുനിന്നും ആറംഗസംഘം
11:01 PM Nov 15, 2018 | Deepika.com